Berlındegi kórme 2 aıǵa sozylady
Germanıa astanasynda qazaqstandyq tanymal sýretshi Baqytnur Búrdesbekovtiń kórmesi ashyldy, dep habarlaıdy Almaty-akshamy.kz «Habar 24» telearnasyna silteme jasap.
Sharaǵa mádenıet qaıratkerleri, qazaqstandyq dıplomattar men sheteldik kolleksıonerler qatysty. Kórmege qylqalam sheberiniń 30-ǵa jýyq eńbegi qoıyldy.
Aıta keteıik, bul Baqytnur Búrdesbekovtyń shetelde ótken alǵashqy kórmesi emes. Onyń kartınalary ár jyldary Fransıa, Túrkıa, Japonıa jáne AQSH turǵyndarynyń nazaryna usynylǵan bolatyn. Berlındegi kórme 2 aıǵa sozylady. Qazirdiń ózinde birneshe sýret satylyp ketken.
«Ádette adam qymbat týyndyny tańdaǵanda birneshe aı, birneshe kún, tym quryǵanda, jarty kún, birneshe saǵat oılanady. Bir áıel adam sýretti 10 mınýt qarady da satyp alýǵa birden sheshim qabyldady. Ol bul kartınaǵa bir kórgennen ǵashyq bolyp qaldy desem qatelespespin. Bul men úshin de úlken abyroı. Sebebi kórmeniń tekke uıymdastyrylmaǵanyna kóz jetkizesiz. Satyp alýshylar ǵana emes, ónerdiń baǵasyn biletin adamdar da kóptep kelip jatyr. Olar "o, keremet kórme ótip jatyr" deıdi»,-dep atap ótti «ARS PRO DONO» galereıasynyń negizin qalaýshy Alekseı Shraıner.