Taksı júrgizýshileri kóligine arnaıy belgi qoıýy kerek, júrgizýshi kartasy bolýy shart.
Elimizde jyly eski kólikterge taksı qyzmetin atqarýǵa shekteý qoıylmaq, dep habarlaıdy Almaty-akshamy.kz
Taksı júrgizýshileri júrgenine 15 jyldan asqan kóliktermen jolaýshy tasymaldaı almaýy múmkin. Qazaqstan standarttaý jáne metrologıa ınstıtýty daıyndaǵan jańa zań jobasy qazir qoǵamdyq talqylaýda. Alaıda júrgizýshiler jańa talapqa qarsy.
Qazaqstanda taksı qyzmetin júıeleý maqsatynda jańa zań jobasy ázirlendi. Qujatqa sáıkes endi júrgizýshiler shyqqanyna 15 jyldan asqan kólikpen jolaýshy tasymaldaı almaýy múmkin. Tipti, osy kásippen nápaqa tapqyńyz kelse mashınańyzdyń júrip ótken qashyqtyǵy 500 shaqyrymnan aspaýy tıis. Jańashyldyq memlekettik standart jobasy aıasynda júzege asyrylǵan.
"Zań jobasynda taksı qyzmetin uıymdastyrýdy ózin-ózi retteýge kóshirý kózdeledi. Al bul taksı tasymaldaýshylarynyń, taksıdiń aqparattyq-dıspecherlik qyzmetteriniń jáne taksıge tapsyrys berýdiń mobıldi qosymshalarynyń jumys prınsıpin ózgertýge, sondaı-aq taksı tasymaldaýshylarynyń ózin-ózi retteıtin uıymǵa múshe bolýyna alyp keledi", dep málimdedi Qazaqstan standarttaý jáne metrologıa ınstıtýtynyń baspasóz qyzmeti.
Oǵan qosa taksı kóliginiń tóbesine arnaıy belgi qoıýǵa mindetti bolady. Júrgizýshiniń fotosy men jeke málimetteri jazylǵan kartasy salonda ilinip turýy qajet. Al taksı qyzmeti arqyly nápaqa taýyp, otbasyn asyrap júrgen azamattar da, jolaýshy retinde kólikke otyratyn turǵyndar da jańashyldyqqa qarsy.
Zań jobasy qoǵamdyq talqylaýǵa shyǵaryldy. Bul – álemdik tájirıbe. Máselen Eýropada taksı júrgizýshileri arnaıy kıim úlgisin kıedi. Ár júrip ótken shaqyrymyńyz ben ýaqytyńyz eseptelip, jolaýshy soǵan saı aqy tóleıdi.