Almatyda 2025 jyly jalpy uzyndyǵy 270 shaqyrym bolatyn 326 kóshege ortasha jóndeý jumystary júrgiziledi dep josparlanǵan. Sonyń ishinde Jetisý aýdanynda 26,2 shaqyrymǵa sozylǵan 33 kóshe qamtyldy. Onyń 15-i Kemel shaǵynaýdanynda ornalasqan, munda shamamen 17 shaqyrym jol jańartyldy,-dep habarlaıdy Aqshamnews.kz.
Jóndeletin tizimge Jaısan, Postyshev, Esim han, Jolymbet, Palladın, Boraldaı jáne basqa da kósheler kirdi. Ásirese, Postyshev kóshesi erekshe mańyzǵa ıe, ol shaǵynaýdannyń negizgi kólik arterıasy sanalady jáne qalany qala mańyndaǵy eldi mekendermen baılanystyrady.
Birneshe jyl buryn bul kóshede ınjenerlik jeliler tartylǵan bolatyn, sol sebepti turǵyndar jóndeý jumystaryn E-otinish júıesi jáne eseptik kezdesýler arqyly birneshe ret suraǵan.
— Búginde aýdan boıynsha 31 kóshede jol jamylǵysy tóseldi. Kemel shaǵynaýdanynda ınjenerlik jeliler júrgizilgen soń kóptegen kóshe qazylyp qalǵan edi. Sol jumystar aıaqtalǵannan keıin jóndeý bastaldy. Asfált tóselip, trotýarlar jasaldy, jol syzyqtary men belgiler qoıyldy. Endi qalǵan eki kóshe qazan aıynyń sońyna deıin aıaqtalady. Shart boıynsha merzim 30 qarashaǵa deıin belgilengen. Merdigerlerge 5 jyldyq kepildik qarastyrylǵan: osy ýaqyt ishinde aqaýdy óz esebinen joıady, — dedi Almaty qalalyq mobıldilik basqarmasy jol jelilerin damytý bóliminiń basshysy Nurzat Ordabaev.
Jumystar keshendi túrde júrgizildi: shamamen 6-10 adamnan turatyn 15 brıgada jáne 27 birlik tehnıka tartyldy. Asfált kúndiz de, túnde de tóseldi.
— Negizgi jumystar jol boıynda aıaqtaldy, trotýarlarda usaq kemshilikterdi túzetý men lúkterdi kóterý ǵana qaldy. Biz bul salada kóp jyldan beri jumys istep kelemiz jáne árdaıym sapany joǵary deńgeıde ustaýǵa tyrysamyz. Barlyq nysanǵa 5 jyldyq kepildik berilgen, — dedi ýchaske bastyǵy Iýrıı Chjen.
Kemel shaǵyaýdanynyń turǵyndary jóndeý jumystaryna erekshe rıza. Ekaterına Tregýbenko bylaı deıdi:
— Birneshe jyl boıy Postyshev kóshesinde ınjenerlik jeliler tartylyp, aınala laı men shuńqyrǵa toly edi. Kólikter men avtobýstar batyp qalatyn, balalar úıge jetý úshin aıaqtaryna paket kıetin. Endi bári ózgerdi: asfált tóselgen jol, trotýarlar men júrginshiler ótkelderi bar. Úıge tynysh ári yńǵaıly jetemiz, balalar úshin qaýipsiz. Aýdan bıligi turǵyndarmen jol jaǵdaıyn talqylaǵan edi, mine, nátıjesi. Iá, áli asfált tóselmegen kósheler bar, biraq kelesi jyly olar da jóndeý tizimine enedi dep ýáde berdi.
Mamandardyń aıtýynsha, jańartylǵan joldar aýdannyń kólik qoljetimdiligin arttyryp, jol qaýipsizdigin jaqsartady jáne qala turǵyndarynyń ómir súrý sapasyn aıtarlyqtaı arttyrady.