Bul týraly Parlamenttik tyńdaýda İshki ister mınıstriniń orynbasary Igor Lepeha aıtty.
Bul shara ınternet-alaıaqtyqtyń aldyn alýǵa baǵyttalǵan, dep habarlaıdy Almaty-akshamy.kz
"Kóptegen adamda "eger bizde aýystyrylatyn nómirlerdi buǵattaý júıesi bolsa, alaıaqtar bizdiń azamattarymyzǵa shetelden qalaı qońyraý shala alady" degen suraq týyndaýy múmkin. Oǵan eki sebep bar. Birinshiden, olar qazaqstandyq uıaly baılanys kompanıalarynyń nómirlerin paıdalana bastady. Sol baıaǵy "droperler" aqyly túrde elektrondy SIM-kartalardy óz attaryna tirkep, ony alaıaqtarǵa beredi, olardyń kómegimen qylmyskerler WhatsApp qosymshasynda tirkeledi. Ony iske qosqannan keıin alaıaqtar jábirlenýshilerge kórsetilgen messendjer arqyly qońyraý shalyp, sóılesedi, al olardyń ornalasqan jerin mundaı jaǵdaıda anyqtaý qıyn bolyp keledi", - dedi Igor Lepeha.
Vedomstvo ókiliniń sózinshe, osy kúnge deıin abonenttik nómirdi basqa adamǵa zańsyz bergeni úshin jaýapkershilik bolmaǵan. Búginde bul olqylyqtyń ornyn toltyrý boıynsha jumystar júrgizilip jatyr. Naqty aıtar bolsaq, ákimshilik zańnamaǵa túzetýler engizý qaralýda.
"Ákimshilik quqyq buzýshylyq týraly kodekstiń 637-baby osyndaı áreketter úshin quqyqtyq jaýapkershilikti kózdeıtin 18-tarmaqpen tolyqtyrylady. Sonymen qatar baqylaý sharalaryn kúsheıtý úshin Sıfrlyq damý mınıstrligi "Baılanys qyzmetterin kórsetý qaǵıdalaryna" tolyqtyrýlar jobasyn ázirledi, oǵan sáıkes telefon nómirlerin tirkeý kezinde azamattar "bıometrıadan" ótýge mindetti bolady. Bul shara azamattyq jaýapkershilikti arttyrady jáne uıaly baılanys qyzmetterin paıdalanýda tártip ornatýǵa múmkindik beredi", - dep tolyqtyrdy spıker.
İshki ister mınıstriniń orynbasary ekinshi sebep retinde alaıaqtardyń arnaıy IP jáne SIP telefonıa baǵdarlamalarynyń múmkindikterin paıdalana bastaýyn aıtty.
"Olardy kompúterge nemese telefon qurylǵysyna ornatqannan keıin alaıaqtar qosymsha qoldanbalardy paıdalanyp, óz nómirin kez kelgen basqa nómirge aýystyrady, osylaısha alaıaqtar qońyraý qabyldaýshylardy aldaıdy", - dedi Igor Lepeha.