Oqý-aǵartý mınıstri qazaqstandyq oqýshylardy 2023-2024 oqý jylynyń aıaqtalýymen quttyqtady. Búgin elimizdiń barlyq mektepterinde bir mezgilde «Bilimim - Otanyma» biryńǵaı synyp saǵaty ótti.
Synyp saǵatynyń aıasynda mınıstr barlyq mektep oqýshylaryn 2023-2024 oqý jylyn tabysty aıaqtaýlarymen quttyqtady, dep habarlaıdy Almaty-akshamy.kz sala mınıstrligine silteme jasap.
Ǵanı Beısembaev Biryńǵaı synyp saǵaty - bir jylda atqarylǵan jumysty qorytyndylap, balalardyń óz muǵalimderine, mektep ujymyna, ata-analaryna alǵys aıtýyna múmkindik beretinin atap ótti.
«Sizderdiń eńbekpen alǵan bilimderińiz Otanǵa degen súıispenshilik pen qurmettiń belgisi! Búgin sizdermen birge elimizdegi tórt mıllıonǵa jýyq oqýshy kelesi synyptarǵa aýysady. Bir jylda sizder eseıip, oqýda, shyǵarmashylyqta, sportta úlken jetistikterge jettińizder. Osy oqý jylynda bizdiń oqýshylar 10 halyqaralyq olımpıadada 243 medal jeńip aldy. Onyń ishinde 20 altyn, 95 kúmis, 128 qola medal bar. Sizderdiń árqaısylaryńyz óz nátıjelerińizben maqtana alasyzdar! Sizderdi shyn júrekten quttyqtaımyn jáne munymen toqtap qalmaýlaryńyzdy tileımin!», - dedi ol óz quttyqtaýynda.
Mınıstr sondaı-aq sý tasqynymen kúreste aldyńǵy qatarda bolyp, kómekke jumylǵan qazaqstandyq pedagogterge alǵysyn bildirdi.
«Qıyndyqtarǵa moıynsunbaı, balalarymyzdy oqytýdy jalǵastyrdyńyzdar, mektepterdi qutqaryp, muqtaj jandarǵa qoldaý kórsettińizder jáne aǵartýshylyq mısıany adal atqardyńyzdar. Sizderdiń eren eńbekterińiz ben ustazdyq kásipke adaldyqtaryńyz úshin eń shynaıy rızashylyǵymdy bildiremin!», - dedi Ǵanı Beısembaev.
Sózin qorytyndylaı kele, mınıstr mektep, kolej bitirýshi túlekterge aldaǵy emtıhandarda sáttilik tiledi. Aıta ketý kerek, 2023-2024 oqý jylyn 3,8 mln-nan astam oqýshy aıaqtaýda. Onyń ishinde 186 myńnan astam 11-synypty bitirýshi bar. Sondaı-aq 150 myńnan astam kolej bitirýshi dıplom ıelenip, tolyqqandy maman bolady.