QR Eńbek jáne halyqty áleýmettik qorǵaý mınıstrligi sý tasqynynan zardap shekkenderge ótemaqy tóleıtini týraly messendjerler men áleýmettik jelilerde taratylyp jatqan aqparat shyndyqqa janaspaıdy.
Bul týraly Almaty-akshamy.kz QR Eńbek jáne halyqty áleýmettik qorǵaý mınıstrligine silteme jasaı otyryp habarlaıdy.
Eńbekmıni sý tasqynynan zardap shekkenderge ótemaqy tólemderin júzege asyratyny týraly áleýmettik jelilerde jáne messendjerlerde jalǵan aqparat taratylýda. Belgisiz tulǵalar tólemderdi alý úshin «Tolyǵyraq» batyrmasyn basýdy nemese siltemege ótýdi usynady.
Memleket basshysynyń tapsyrmasyna sáıkes sý tasqynynan zardap shekken qazaqstandyqtarǵa jergilikti atqarýshy organdar birjolǵy tólem túrinde kómek kórsetedi. Olardyń mólsheri ár óńirde keltirilgen materıaldyq zalaldy esepteý úshin qurylǵan arnaıy komısıalardyń sheshimi boıynsha jeke-jeke belgilenetin bolady.
Tıisinshe, habarlamada kórsetilgen silteme alaıaqtardyń azamattardyń jeke derekterin alý tásili bolýy múmkin. Alaıaqtarmen ózara árekettesýdi boldyrmaý úshin eshbir jaǵdaıda siltemege ótpeýge keńes beremiz.
Memlekettik qoldaýdyń tıisti sharalary týraly resmı aqparat tek qana 1414 nómirinen SMS-habarlamalar arqyly taratylady.
Azamattardy tek qana resmı aqparat kózderine súıenýge shaqyramyz.
Jalǵan aqparat taratý zańmen jazalanatynyn esterińizge salamyz.