Elordada III Halyqaralyq «Tomırıs» stýdenttik kınofestıvali ótip jatyr.
Bıylǵy baıqaýǵa Qazaqstan, Reseı, Qyrǵyzstan, Armenıa, Fransıa, Chehıa men Ońtústik Koreıadan talantty jas rejıserler qatysyp jatyr. Qazylar alqasynyń nazaryna anımasıadan bastap, túrli janrdaǵy 53 fılm usynylady, dep habarlaıdy Almaty-akshamy.kz Qazaqtv.com saıtyna silteme jasap.
Olardyń - 34-i halyqaralyq, 19-y ulttyq fılmder nomınasıasy boıynsha synǵa túsedi. Týyndylardy 3 kún kóleminde áıgili sheteldik kınorejısserler men otandyq bilikti mamandar baǵalaıdy. Olardyń qatarynda tanymal kınorejısser, «Oskar» syılyǵynyń eki márte nomınanty Sergeı Bodrov ta bar.
«Sapaly kıno degen neni bildiredi? Bul - qyzyqty taqyryp, sonymen qatar ózekti taqyryptardyń biri. Ekinshi krıterıı – kórkemdik qasıet. Kez kelgen adam kamerany alyp, kez kelgen nárseni, kez kelgen oqıǵany túsire alady. Biraq kórkem be, bul rejıserdiń bolashaqta fılm nemese serıal túsirýge múmkindigi bar ma? Mine, osynyń barlyǵy kıno tiline baılanysty bolmaq. Qanshalyqty jaqsy prodússerdiń tabylýy, operatorlar men akterlerdiń bolýy , munyń barlyǵy da kórkemdik sapaǵa kelip tireledi», - deıdi qazylar alqasynyń tóraǵasy Gúlnar Ábikeeva.
«Burqasyn» kartınasymen qatysyp otyrmyn. Bul fılm osydan eki jyl buryn túsirilgen edi. Týyndy qazirgi ýaqytpen jańa tynys alyp, mine karantınnen keıin halyqaralyq festıválde kórsetilýde. Men úshin bul óte mańyzdy. Kartınada 1986 jylǵy Jeltoqsan oqıǵasy týraly baıandalady. Men ony birinshi kýrsta oqyp júrgende túsirgem. Sońǵy kezde bul taqyryp ózekti bola bastady», - deıdi kınofestıvalge qatysýshy Ádilet Esim.