Qasym-Jomart Toqaevqa UKP-ny transformasıalaý joldary tanystyryldy.
Raıymbek Batalov bıylǵy aqpan aıynda ótken Kásipkerler palatasynyń kezekten tys sezinde mıkro jáne shaǵyn bıznesti qoldaýǵa mán bere otyryp, mekemeniń qyzmetin transformasıalaý týraly sheshim qabyldanǵany týraly aıtty. Sondaı-aq «Atameken» basshysy Almatyda shaǵyn jáne orta bıznesti damytý baǵdarlamasynyń júzege asyrylýy jóninde málimet berdi, dep habarlaıdy Almaty-akshamy.kz Elorda.info-ǵa silteme jasap.
Memleket basshysyna salalyq saraptamanyń sapasy men jaýapkershiligin arttyrý úshin bıznesti jumyldyrý jónindegi UKP-nyń jospary tanystyryldy. Atap aıtqanda, palata memlekettik organdardyń baǵdarlamalyq qujattary men buıryqtaryna qatysty jobalardy bıznespen birge talqylap, aprobasıadan ótkizýge nıetti. Bul memleket pen bıznestiń ózara konstrýktıvti yqpaldastyǵyn nyǵaıtýǵa múmkindik beredi.
Kezdesý barysynda bızneske jasalatyn zańnamalyq deńgeıdegi qysymdy azaıtýǵa, sot pen prokýratýra organdarynyń bıznesti qorǵaý jónindegi tıimdiligin arttyrýǵa erekshe nazar aýdaryldy.
Qasym-Jomart Toqaev palatanyń bıznes pen bılik arasyndaǵy yqpaldastyqtyń altyn kópiri bolýǵa tıis ekenin erekshe atap ótip, «Atamekenniń» qyzmetin júıeli túrde ózgertý qajettigin qoldady.
Sonymen qatar Prezıdent bıznes-ortany búrokratıadan aryltý jóninde qabyldanyp jatqan sharalardy jáne júktelgen mindetterdi jyldam ári tıimdi sheshý úshin transformasıa kezinde prezıdıým tóraǵasy men palata basqarmasynyń pozısıalaryn qosý qajet ekenin maquldady.
Memleket basshysy kásipkerlikti damytýǵa jáne bıznes-qoǵamdastyqtyń quqyǵyn qorǵaýǵa yqpal etetin ınstıtýt retinde UKP-ny reformalaý jumystaryn jandandyrýdy tapsyrdy.