Elorda kúnine arnalǵan is-sharalar qyzyqty bolmaq
21-29 maýsym aralyǵynda el Táýelsizdiginiń 30 jyldyǵy men Astana kúnine oraı «Elorda – óner ólkesi» atty teatrlardyń alǵashqy halyqaralyq shyǵarmashylyq kezdesýi ótedi, dep habarlady Almaty-akshamy.kz Mádenıet jáne sport mınıstrliginiń habaryna silteme jasap.
Festıválge elimizben qatar, Ózbekstan men Qyrǵyz Respýblıkasynyń óner oshaqtary qatysyp jatyr. Kezdesý baǵdarlamasynda spektáklder kórsetilimi, premeralar, rejıssýra, sahnalyq sóıleý, akterlik sheberlik, án aıtý, bı jáne t. b. baǵyttar boıynsha teatr óneriniń jetekshi qaıratkerleriniń master-klasy bar. İs-sharaǵa óńirlik teatrlardyń basshylary, dıplomatıalyq korpýs, Qazaqstan halqy Assambleıasynyń músheleri jáne t.b. shaqyryldy.
Bizdiń anyqtama: İs-sharaǵa Q.Qýanyshbaev atyndaǵy memlekettik akademıalyq qazaq mýzykalyq-drama teatry, Ǵ.Músirepov atyndaǵy Qazaq memlekettik akademıalyq balalar men jasóspirimder teatry, M.Gorkıı atyndaǵy Memlekettik akademıalyq orys drama teatry, Qazaqstan Respýblıkasynyń Ulttyq ulan án-bı ansambli, Nur-Sultan qalasy ákimdiginiń Jastar teatry, Astana Musical Memlekettik teatry jáne Á.Mámbetov atyndaǵy memlekettik drama jáne komedıa teatry, Ózbekstan Respýblıkasy Ózbek ulttyq akademıalyq drama teatry men Qyrǵyz Respýblıkasy B.Qydykeeva atyndaǵy Qyrǵyz memlekettik jastar teatrynyń ártisteri qatysady. Ótetin orny: Q.Qýanyshbaev atyndaǵy Qazaq mýzykalyq-drama teatry, «Qazaqstan» ortalyq konsert zaly, NOMAD City Hall (EKSPO ortalyǵy), M. Gorkıı atyndaǵy Memlekettik akademıalyq orys drama teatry, Nur-Sultan qalasynyń jas kórermenniń mýzykalyq teatry.
Negizgi is-sharanyń biri 4 shildede saǵat 11:00-de jáne saǵat 21:00-de Ulttyq dombyra kúnine arnalǵan «Qazaqstan» telearnasyndaǵy onlaın kórsetilim «EKSPO» halyqaralyq kórme ortalyǵynda ótedi.
Al 2-3 shilde aralyǵynda «Astana Balet» teatrynyń sahnasynda Reseı Federasıasynyń eńbek sińirgen óner qaıratkeri Georgıı Kovtýnnyń «Qozy Kórpesh – Baıan sulý» poema-baletiniń premerasy ótedi.
Sonymen qatar, 4 shilde saǵat 18:00-de «Astana Opera» memlekettik opera jáne balet teatrynyń sahnasynda Astana Opera halyqaralyq opera akademıasynyń tusaýkeseri men saltanatty ashylýy ótedi. Ashylý saltanatynda ıtalándyq opera ánshileri Mattıa Rossı, Franchesko Mellı, mońǵolıalyq opera ánshisi Badral Chýlýýnbaatar, qyrǵyz opera ánshisi Saıan Isın, «Astana Opera» teatrynyń jetekshi solıseri óner kórsetedi.
Sondaı-aq 6 shildede amfıteatrda «Astana Opera» solıseri men kameralyq orkestrdiń qatysýymen gala-konsert ótedi.