Bıyl "Úzdik pedagog" respýblıkalyq baıqaýynyń irikteý kezeńine (aýdandyq) 1468 maman qatysyp, odan ótken 793 pedagog oblystyq deńgeıde baq synady, - dep habarlaıdy Aqshamnews.kz tilshisi Oqý-aǵartý mınıstrliginiń baspasóz qyzmetine silteme jasap.
Dástúrli konkýrstyń fınaldyq kezeńine 174 maman joldama aldy.
Onyń ishinde orta bilim berý, kásiptik jáne tehnıkalyq bilim berý, mektepke deıingi, qosysha bilim berý uıymdarynyń pedagogteri bar. Óz isiniń sheberi dep tanylǵan bul mamandar endi respýblıkalyq kezeńde "Úzdik pedagog" ataǵy úshin saıysqa túsedi.
Baıqaýdyń maqsaty – bilim berý júıesin damytýǵa eleýli úles qosyp, jemisti jumysymen, erekshe sheberligimen kózge túsken ustazdardy anyqtaý.
25 qyrkúıek kúni konkýrstyń respýblıkalyq kezeńi bastaý aldy. Respýblıka kúni qarsańynda elimizdiń "Úzdik pedagogi" anyqtalyp, jeńimpazdardyń esimi jarıalanbaq. Júldegerlerge "Úzdik pedagog" ataǵy berilip, 1000 AEK kólemindegi syıaqy tabystalady.
Atalǵan baıqaý 2012 jyldan beri dástúrli túrde ótkizilip keledi. Búginde Qazaqstanda 700-den astam "Úzdik pedagog" ataǵynyń ıegeri bar.