Ákimdikter áleýmettik mańyzdy azyq-túlik baǵasyn ustaı almaı otyr.
Saýda jáne ıntegrasıa mınıstri Serik Jumanǵarın azyq-túlik baǵasy sharyqtap turǵan óńirlerdi atady, dep habarlaıdy Almaty-akshamy.kz
Qazaqstanda jyl basynan beri azyq-túlik ınflásıasynyń ortasha deńgeıi 1,4 paıyzdy qurady. Biraq keıbir óńirlerde bul kórsetkish áldeqaıda joǵary bolyp tur.
Atap aıtqanda, Astana men Shymkent qalalarynda 2,2%, Qyzylorda men Soltústik Qazaqstan oblystarynda 1,8%, Aqtóbe oblysynda 1,7%, al Ulytaý oblysynda azyq-túlik 1,5 paıyzǵa qymbattady.
Ákimdikter áleýmettik mańyzdy azyq-túlik taýarlary baǵasyn da ustaı almaı otyr. Máselen, Mańǵystaý oblysynda osy sanattaǵy taýarlar 3,4 paıyzǵa kóterildi. Ulytaý oblysynda 2,8%-ǵa, al Astana qalasynda 2,5%-ǵa ósken.
"Taýarlar bólinisinde jyl basynan beri eń joǵary ósim pıazǵa 22,5%, kúrish 5,2%, qyryqqabat 4,1%, sút jáne sábiz 3,1%, kartop 3,0%, makaron 2,6%-dy qurady", - dedi Jumanǵarın.
Mınıstrdiń aıtýynsha, ákimdikter qolda bar sharalardy da, qarjyny da tıimdi paıdalanyp jatqan joq. Máselen, Mańǵystaý oblysynda baǵany turaqtandyrýǵa arnalǵan 3,6 mıllıard teńgeniń 2 mıllıard teńgesi ıgerilmeı jatyr.
Al Astana qalasynda "aınalym sqemasy" boıynsha qarjylandyrýǵa bólingen qarjynyń kólemi 14 mıllıard teńgeni quraıdy. Soǵan qaramastan, elorda baǵanyń ósýi boıynsha kóshbasshylar úshtigine kiredi.