Prezıdent zańǵa qol qoıdy.
Memleket basshysy Qasym-Jomart Toqaev "Sot júıesi men sýdıalarynyń mártebesi týraly" Konstıtýsıalyq zańǵa ózgerister engizý týraly Konstıtýsıalyq zańǵa jáne oǵan ilespe zańǵa qol qoıdy, dep habarlaıdy Almaty-akshamy.kz Aqordaǵa silteme jasap.
Zańǵa sáıkes, endi quqyq qorǵaý organdary sýdıalarǵa qysym kórsete almaıdy. Sýdıalarǵa qatysty arnaıy jedel-izdestirý sharalary tek bas prokýrordyń sanksıasymen ǵana júrgiziledi.
Buryn quqyq qorǵaý organdary qylmystyq is qozǵamaı-aq kez kelgen sýdıaǵa qarsy arnaıy jedel izdestirý sharalaryn júrgize alatyn. Bul úshin oblys prokýrorynyń sanksıasy jetkilikti bolatyn.
"Senatta zań jobasyn talqylaı kele, sýdıalarǵa qatysty arnaıy jedel-izdestirý sharalaryn tek bas prokýrordyń sanksıa berýimen ǵana júrgizý qajet degen toqtamǵa keldik. Sondyqtan bul kepildi Konstıtýsıalyq zań deńgeıinde bekitý usynylyp otyr", - dep túsindirgen edi normanyń engizilýin senat depýtaty Andreı Lýkın.
Depýtattar bul norma sýdıalardyń táýelsizdigin nyǵaıtady degen úmitte.
Sonymen qatar aýdandyq sottyń tóraǵalaryn kadr rezervindegi jáne óz-ózin usynǵan azamattardyń arasynan saılaý tetigi engizildi. Sýdıa qaýymdastyǵy kandıdatty ózi usyna alady.
Budan bólek, qabyldanǵan zańǵa sáıkes, senat Joǵarǵy sottyń sýdıalaryn da balamaly negizde saılaıdy. Senatqa keminde eki sýdıanyń kandıdatýrasy usynylady.