Búginde eldegi 116 balalar úıinde 3700-ge jýyq jasóspirim tárbıelenip jatyr.
Aldaǵy jyldary elimizdegi balalar úıleriniń sanyn 2 esege azaıtý kózdelip otyr. Búgin elordadaǵy qıyn jaǵdaıǵa tap bolǵan balalardy qoldaý ortalyǵyna barǵan Premer-mınıstr Álıhan Smaıylov osylaı dedi, dep habarlaıdy Almaty-akshamy.kz
24.kz-tiń aqparaty boıynsha, ortalyqta 3 jastan 18 jasqa deıingi 66 bala tárbıelenip jatyr, onyń 28-i – jetim bóbek. Álıhan Smaıylov tárbıelenýshilerdi Balalardy qorǵaý kúnimen quttyqtap, olardyń turmysymen jáne oqý jaǵdaımen tanysty. Kezdesý barysynda Úkimet basshysy jetim jáne ata-anasynyń qamqorlyǵynsyz qalǵan balalarǵa qatysty suraqtarǵa egjeı-tegjeıli jaýap berdi. Bıyl áleýmettik osal toptar úshin jaldamaly páterge 100 mlrd teńge bólense, sonyń 20%-y jetim balalardy baspanamen qamtýǵa baǵyttalady.
«Bizdiń maqsatymyz – aldaǵy 3 jyldyń ishinde balalar úıleriniń sanyn 2 esege qysqartyp, sol jerdegi balalardy barynsha otbasylarǵa ornalastyrý. Týysqandarynyń, patronattyq otbasylar bar, solarǵa jaǵdaı jasaýymyz kerek. Sondyqtan biz tıisti zańnamaǵa ózgeris engizip jatyrmyz», - deıdi QR Premer-Mınıstri Álıhan Smaıylov.
Sońǵy 10 jylda eldegi balalar úıleriniń sany 41%-ke, al ondaǵy balalar sany 65%-ke azaıǵan. Búgingi kezdesý barysynda elordadaǵy balalardy qoldaý ortalyǵynyń dırektory Bıbigúl Takısova Premer-mınıstrge mekeme aýmaǵynda sport alańyn salý jóninde ótinish bildirdi. Álıhan Smaıylov qala ákimi Jeńis Qasymbekke osy máseleni qysqa merzimde sheshýdi tapsyrdy.
«Keıingi 3 jylda 40 balany otbasylarǵa, qamqorlyqqa, patronattyqqa ornalastyrdyq. Týǵan ata-analaryna tabystalǵandary bar. Balalardy otbasylaryna oraltý maqsatynda qujat rásimdeý, materıaldyq kómek kórsetý baǵytynda jumystar atqaryp jatyrmyz», - deıdi Ómirlik qıyn jaǵdaıǵa tap bolǵan balalardy qoldaý ortalyǵynyń dırektory Bıbigúl Takısova.
«Biz kótergen problemalyq máseleler – bul, eń aldymen, baspana túıtkili. Bizdiń qaýymdastyq málimetine saı, balalar úıleriniń 62 myń túlegi páter kezegin kútip otyr. Osy máselelerdi jıi talqylap, sheshý joldaryn tabý ózekti bolyp otyr», - deıdi Qazaqstannyń balalar úıleri túlekteri qaýymdastyǵynyń basshysy Rafael Gasanov.