Qazaqstanǵa sport salasy boıynsha ǵylymı zertteý ınstıtýty kerek - Elsıar Qanaǵatov
Elimizde sport jáne sporttyq jetistikter boıynsha ǵylymı-zertteý ınstıtýty qurylýy múmkin. Bul týraly QR Ulttyq Olımpıada komıteti sport dıreksıasynyń dırektory Elsıar Qanaǵatov málim etti,
«Sheteldik tájirıbeli jattyqtyrýshylardy tartý - sportta bar jaıt. Aıtar bolsaq, Qytaı 2008 jyly Jazǵy Olımpıadany ótkizgen kezde, kóptegen sheteldik jattyqtyrýshylardy tartty. Árıne, olardyń qasynda otandyq jattyqtyrýshylar boldy. Atalǵan tájirıbeni biz de qoldanyp jatyrmyz. Short-trekten Koreıa jáne Qytaı elinen jattyqtyrýshylar boldy. Jalpy, sportta aıtarlyqtaı nátıjege qol jetkizgimiz kelse, tómennen bastaýymyz kerek. Iaǵnı balalar men jasóspirim jáne buqaralyq sportqa jiti kóńil bólgen jón», - dedi Elsıar Qanaǵatov Beıjińnen tikeleı efırde ótken baspasóz máslıhatynda.
Onyń aıtýynsha, buqaralyq sportty damyta túsý - kún tártibindegi másele.
«Árıne, sportta ǵylymnyń da óz orny bar. Men atalǵan máseleni buǵan deıin de kóterip kelemin. Bizde ǵylymı zertteý ınstıtýty joq. Ǵylymı turǵydan zertteý ol kásibı jáne buqaralyq sport úshin de kerek. Búginde sport boıynsha ǵylymı zertteý ınstıtýtyn qurý máselesi kún tártibinde tur. Instıtýt qurylyp, qysqy sport túri odan ári damı túsedi degen úmittemin», - deıdi ol.