«KURYLYS LTD» JSHS quryltaıshysy jáne basshysy retinde Bolat Nazarbaev kórsetilgen.
Saýda jáne ıntegrasıa mınıstrligi «Altyn Orda» bazarynyń aýmaǵy «KURYLYS LTD» JSHS-na, al qosymsha jalgerlik quqy «Atyn Orda QazTrade Ltd» JSHS-na tıesili ekenin málimdedi, dep habarlady Almaty-akshamy.kz Turkystan.kz silteme jasap.
Jalpy saýda alańy 218 151 sharshy metrdi quraıdy. Taýar aınalymynyń kólemi aıyna orta eseppen 147 mln teńgege, júk aınalymy kúnine 500 KamAZ-ǵa deıin jetedi. Kúnine bazarǵa 8-15 myń satyp alýshy keledi.
«Altyn Orda» bazarynda 5050 saýda orny bar. Olardy 45 440 adam jalǵa alady. Jaldaý quny orta eseppen 42,5 myń teńgeni quraıdy. Sondaı-aq aýmaǵynda «Altyn Orda» qonaq úıi ornalasqan. Saýda mınıstrligi bazar ishki saýda erejelerimen belgilengen talaptarǵa sáıkes kelmeıtinin, saýdanyń kóleńkeli aınalymy bar ekenin málimdedi.
Vedomstvo bazar jumysyn toqtatý jaǵymsyz saldarǵa ákelýi múmkin dep otyr.
«Mysaly, bazardaǵy saýda jáne jumys oryndarynyń sanyn qysqartý ol jerdegilerdiń narazylyǵyn týǵyzady. Sondaı-aq taýar aǵyny Qyrǵyzstannyń Dordoı bazaryna kóship, saýda oryndarynda apatty jaǵdaılardyń paıda bolýyna ákelýi múmkin. Jaqyn mańdaǵy bazarlar úlken taýar aǵynyna tótep bere almaıdy. Almaty oblysynda 84 bazar, Almatyda 45 bazar jumys isteıdi. Olarda artyq oryn joq, tolyp tur», – delingen mınıstrlik habarlamasynda.
Aıta ketsek, Qasym-Jomart Toqaev Almaty oblysy men Almaty ákimderine Úkimetpen birlesip, eki aı ýaqytta «Altyn Orda» bazarynda tártip ornatýdy tapsyrǵan. Prezıdent ol jerdiń paıdakúnemder úshin naǵyz «maıshelpekke» aınalǵanyn aıtqan bolatyn.
Azamattarǵa arnalǵan úkimettiń derekterine sáıkes, «KURYLYS LTD» JSHS quryltaıshysy jáne basshysy retinde Bolat Nazarbaev kórsetilgen.