Qazaqstanda baılyq salyǵy engizilýi múmkin.
Bul týraly Qasym-Jomart Toqaev «Ádiletti memleket. Birtutas ult. Berekeli qoǵam» atty Qazaqstan halqyna Joldaýynda aıtty, dep habarlaıdy Almaty-akshamy.kz.
«Salyq reformasy aıasynda «sán-saltanatqa» salyq salýdy engizgen jón. Munyń orta tapqa qatysy joq, bul salyq tek asa qymbat jyljymaıtyn múlik jáne avtokólik satyp alǵan kezde salynady», - dep málim etti.
Aıta keteıik, elimizde 2023 jyly jańa Salyq kodeksi ázirlenedi. Onda onyń eń túıtkildi tusy sanalatyn salyqtyq ákimshilendirý máselesi túgel qaıta jazylady. Biz óz kezegimizde bul máselege qatysty halyq pikirin estip qaıttyq. Pikirler san túrli.
«Jaqsy ómir súrgiń kelse, tóleýiń kerek. Qoldaımyz, árıne. Biz sol salyq arqyly medısına, mektep, basqa da búdjettik salalarda jumys isteıtin, tipti túrmede otyrǵandardyń da aqshasyn sol salyqtan tóleıdi. Halyqtyń salyǵynan tólenetin nárseler ǵoı. Árıne, qoldaımyz, aqsha Úkimetke tússe, paıdasy bolady ǵoı bizge de».
«Kásipkerler bar, baı kásipkerler. Olardan salyq alǵan durys dep esepteımin. Óıtkeni ol salyq bizdiń búdjetke túsedi. Sondyqtan búdjetimiz baı bolsa, halyqymyz da baı bolady, elimiz de baı bolady».
«Eger shynymen júzege asyrylatyn bolsa, óte jaqsy bastama. Bul azamattar arasynda uzaq ýaqyttan beri aıtylyp keletin másele. Eń bastysy, aıtylǵandaı iske asyrylsa deımiz. Alaıda, shyny kerek, meniń senimim azdaý», - degenge saıady pikirler.