Byltyr shyǵarylǵan qaldyqtyń 21,1 paıyzy qaıta óńdeldi
Elimizde jylyna 4,5 mln tonna qaldyq shyǵarylady. Bul týraly ekologıa vıse-mınıstri Zúlfıa Súleımenova málim etti, dep habarlaıdy Almaty-akshamy.kz.
«Jyl saıyn 4,5 mln tonna qaldyq shyǵarylady. Byltyr 4,2 mln tonna qoqys tógildi. Onyń 21,1% qaıta óńdeldi. Bıyl bul kórsetkish 24%-ke jetedi dep josparlap otyrmyz. Oń dınamıka baıqalǵanymen, jetispeı jatqan tustar da bar. Máselen, qoqys keıbir aımaqtarda kóp, keıbir aımaqtarda óte az óńdeledi», – dep málim etti Zúlfıa Súleımenova.
Vıse-mınıstr aqparatyna saı endi vedomstvo qaýipti qaldyqtardy óńdeý jáne olardy joıýmen aınalysatyn kompanıalardyń jumysyna baqylaý júrgizetin bolady. Ekologıalyq kodekske ózgeris engizý týraly sheshim mańyzdy boldy. Sebebi bul ýaqytqa deıin naryqta qoqys shyǵarý, óńdeý jáne suryptaýmen aınalysatyn bıznes sýbektileri belgisiz edi. Endi shaǵyn kásiporyndar qaldyqtardy shyǵaratyn bolsa, onda ony qaı jerge tógetini týraly Ekologıa mınıstrligine habarlama beredi.
«Buryn belgilenbegen oryndarǵa qoqys tógý faktileri kóp tirkelgen edi. Máselen, byltyr 7 myńnan astam ruqsat etilmegen qaldyqtardy tógý orny anyqtaldy. Onyń 89% joıyldy. Al bıyl mamyr aıynan bastap 1,5 myńǵa jýyq ruqsat etilmegen úıindiler anyqtaldy», – dedi Zúlfıa Súleımenova.
Búginde asa qaýipti qaldyqtardy joıýmen aınalysatyn 60-qa jýyq kompanıa lısenzıa alǵan. Al jalpy qoqysty shyǵarý, óńdeý jáne suryptaý qyzmetin kórsetetin 990-nan astam bıznes sýbektisi bar.