QR Premer-Mınıstriniń orynbasary Tamara Dúısenova Májilistiń jalpy otyrysynda halyqty jumyspen qamtý, shaǵyn jáne orta bıznesti damytý jónindegi sharalar týraly aıtty, dep habarlaıdy Almaty-akshamy.kz.
Primeminister.kz-tiń habarlaýynsha, ol jastar sanatyna jatatyn tulǵalardyń jas mólsheri 35-ke deıin ulǵaıtylǵanyn eske saldy. Bul 6 mln-ǵa jýyq azamattyń memlekettik qoldaý sharalaryn, onyń ishinde jumyspen qamtý bóligin tıimdi paıdalanýǵa múmkindik berdi.
«Aǵymdaǵy jyly 20 óńirde jumyspen qamtý jospary iske asyrylýda. Olarda alǵash ret aımaqtardyń óńirlik eńbek naryǵynyń ereksheligi eskerilip, tıisinshe memlekettik qoldaý sharalary saralandy. 1 qazandaǵy jaǵdaı boıynsha 715 myńnan astam adam jańa, bos jáne memleket sýbsıdıalaıtyn jumys oryndaryna ornalastyryldy, onyń jartysy – jastar», — dedi vıse-premer.
Tamara Dúısenovanyń aıtýynsha, Úkimet júzege asyryp otyrǵan ınvestısıalyq jobalardyń orny erekshe. Máselen, bıyl jalpy somasy 273 mıllıard teńgeden asatyn qarjyǵa 64 joba júzege asyryla bastady. Sonyń arqasynda 12 myńnan asa jumys orny ashylady dep kútilýde.
«Jalpy, Úkimet ónerkásiptiń túrli salalarynda sapaly jáne turaqty jumys oryndary ashý úshin aldaǵy jyldary osyndaı 800 ınvestısıalyq jobany iske asyrýdy josparlap otyr», — dedi Tamara Dúısenova.
Ol Úkimette shaǵyn jáne orta bıznesti qoldaý jáne damytý jóninde keshendi baǵdarlama ázirlenip jatqanyn atap ótti.
«Búginde “taza paraqtan retteý” qaǵıdatyn baıqap kórdik. Bir jarym jyl ishinde 44 sala boıynsha 128 myń talap saraptaldy. Onyń 9 myńy jańa retteýshi saıasattyń sharttaryna sáıkes kelmeıdi», — dep atap ótti Tamara Dúısenova.
Onyń aıtýynsha, taıaý arada kásipkerler úshin salyq organdary aldynda esep berý úrdisi edáýir jeńildeıdi. Máselen, kórsetkishteri nólge teń bolsa, quzyrly organdarǵa esep berýdi mindettemeý josparlanyp otyr. Osy arqyly kásip ıesiniń shoty buǵattalmaıtyn bolady. Salyq organdaryna beriletin eseptilik 30%-ǵa qysqarmaq. Josparly tekserýler de azaıady.
«Memlekettik baqylaý jáne qadaǵalaý salalarynda táýekelderdi basqarý júıelerin avtomattandyrý isi qolǵa alyndy. Bul qadam bıznesti josparly túrde tekserýdi 2 ese azaıtýǵa múmkindik beredi», — dep túıindedi sózin Tamara Dúısenova.