«Shaǵyn elektr kólik quraly» uǵymy engiziledi
Úkimet basshysynyń orynbasary Roman Sklár elektrosamokattardy jikteýge jáne quqyqtyq retteýge qatysty túsinik berdi, dep habarlaıdy Almaty-akshamy.kz QazAqparatqa silteme jasap.
Aıta keteıik, bıyl qazan aıynda Senattyń jalpy otyrysynda depýtat Nurtóre Júsip óziniń depýtattyq saýalynda jol qaýipsizdigi máselesin kóterdi.
Osy oraıda elektrosamokattar, samokattar men gıroskýterler tek olardyń ıeleriniń ǵana emes, jaıaý júrginshilerdiń de ómiri men densaýlyǵyna eleýli qaýip tóndiretini aıtyldy.
«Kedendik baqylaý aıasynda tehnıkalyq reglamentter men standarttarǵa sáıkes kelmeıtin elektrosamokattardyń elge ákelinýin shekteýdi engizý úshin Eýrazıalyq ekonomıkalyq odaq aýqymynda tehnıkalyq reglamentke tıisti tolyqtyrýlardy kózdeý qajet. Osyǵan baılanysty, bıylǵy 17 tamyzda Eýrazıalyq ekonomıkalyq komısıaǵa (EEK) «Mashınalar men jabdyqtardyń qaýipsizdigi týraly» Keden odaǵynyń tehnıkalyq reglamenti aıasynda retteý úshin elektr samokattaryn qosý boıynsha usynys engizildi. Atalǵan másele múddeli taraptardyń qatysýymen EEK alańynda qaralatyn bolady», - dedi R. Sklár depýtattyq saýalǵa jaýap bere otyryp.
Onyń aıtýynsha, tıisti ulttyq standarttardy ázirleý Tehnıkalyq reglament jańarǵannan keıin júrgiziletin bolady.
Sondaı-aq elektrosamokattardy quqyqtyq retteý úshin qazirgi tańda QR Parlamenti Májilisi depýtattarynyń bastamashylyǵymen «Qazaqstan Respýblıkasynyń keıbir zańnamalyq aktilerine jol júrisin uıymdastyrý máseleleri boıynsha ózgerister men tolyqtyrýlar engizý týraly» zań jobasy ázirlengen.
«Osy zań jobasy elektrosamokattardyń jol júrisine qatysýyn reglamentteý, «shaǵyn elektr kólik quraly» uǵymyn engizý, sondaı-aq osy quraldardy basqaratyndardyń quqyqtary men mindetterin belgileý bóliginde túzetýlerdi kózdeıdi. Qazirgi ýaqytta múddeli memlekettik organdar osy zań jobasyna Úkimet qorytyndysynyń jobasyn ázirleýde. Kórsetilgen aktilerdi qabyldaý elektrosamokattardy paıdalaný máselelerin quqyqtyq retteýdi qamtamasyz etedi», - dedi Roman Sklár.