Jyl basynan beri elimizde balalardyń qatysýymen 700-den astam jol kólik oqıǵasy tirkelgen.
Bul týraly İshki ister mınıstrliginiń ákimshilik polısıa komıtetiniń basqarma basshysy Áset Ospanov málim etti, dep habarlaıdy almaty-akshamy.kz.
«Jaz mezgilinde balalardyń qaýipsizdigine erekshe mán beriledi. Sebebi kanıkýl kezinde olardyń bos ýaqyty kóp. Keıde balalar jol qaýipsizdigi erejelerin saqtamaı jatady. Ata-anasyna qarap boı túzeıdi, mysaly, ata-ana jol boıyn kesip óte salsa, ony kórgen bala qaıtalaıdy. Jyl basynan beri balalardyń qatysýymen 700-den astam jol kólik oqıǵasy tirkeldi», - dedi Áset Ospanov ortalyq komýnıkasıalar qyzmeti alańynda ótken baspasóz máslıhatynda.
Komıtet basshysynyń aıtýynsha, jol qaýipizdigin qamtý maqsatynda birqatar is-shara atqarylyp jatyr.
«Jol-kólik oqıǵalarynyń aldyn alý maqsatynda jyl saıyn «Nazar aýdaryńyz, balalar!», «Qaýipsiz jol», «Mektepke jol» taǵy sol sıaqty profılaktıkalyq sharalar ótkiziledi. Mysaly, 15-31 mamyr aralyǵynda el kóleminde «Nazar aýdaryńyz – balalar» is-sharasy ótti. Maqsaty-balalarǵa jol-kólik erejelerin úıretý, qaýipsizdiń mańyzdylyǵyn túsindirý», - deıdi ol.
Odan bólek, İİM ókili balalardy tasymaldaıtyn avtobýstardyń talapqa sáıkestigi tekseriletinin aıtty.