Byltyr elimizde eki balalar úıi jabyldy
Bilim jáne ǵylym vıse-mınıstri Bıbigúl Asylova vedomstvonyń alqa otyrysynda elimizde balalar úıleriniń sany birtindep azaıyp kele jatqanyn aıtty, dep habarlaıdy Almaty-akshamy.kz
Bıbigúl Asylova elimizdegi balalar úıi tárbıelenýshileriniń 81 paıyzy otbasynda ómir súrý quqyǵyn paıdalanǵanyn aıtty.
«Balalar úıiniń sany 30-ǵa deıin qysqardy, 2021 jyly taǵy 2 balalar úıi, 1 qıyn jaǵdaıda qalǵan balalardy qoldaý ortalyǵy, 1 balalar úıi jabyldy. Búgingi tańda jetim balalarǵa arnalǵan uıymdarda 4 myńǵa jýyq bala turady. Biz eki baǵytta – tárbıelenýshilerge jaıly jaǵdaı jasaýdy qadaǵalaý jáne balalardyń otbasynda tárbıelenýin qamtamasyz etý boıynsha jumysymyzdy jalǵastyramyz»,– dedi ol.
Sonymen qatar Asylova byltyr balalardyń quqyǵyn qorǵaý salasynda memlekettik baqylaý júrgizilgenin jetkizdi. Onda elimizdiń 17 aımaǵynan 390 balalar mekemesi qamtylǵan.
«Atyraý, Shyǵys Qazaqstan, Jambyl oblystarynda, Nur-Sultan jáne Shymkent qalalarynda jetim jáne ata-anasynyń qamqorlyǵynsyz qalǵan balalardyń quqyqtaryn óreskel buzý faktileri anyqtaldy. Balalardy otbasyna ornalastyrý, baspanamen qamtamasyz etý, jumysqa ornalastyrý merzimindegi quqyqbuzýshylyqtar kóptegen óńirlerge tán. Tekserý qorytyndysy boıynsha atalǵan oblystardyń qorǵanshylyq organdarynyń mamandary respýblıkalyq derekter bankin ýaqtyly jáne durys júrgizbegeni jáne basqa da zańbuzýshylyqtar úshin aıyppul túrindegi ákimshilik jaýapkershilikke tartyldy. Máselen, Atyraý qalalyq qorǵanshylyq organynyń mamandary 8 balanyń saýalnamasyna ýaqtyly ózgerister engizbegen. Tekserilgen oblystardyń barlyǵynda derlik osyndaı zańbuzýshylyqtar bar», – deıdi spıker.
Sondaı-aq, onyń sózinshe, Aqtóbe, Atyraý, Shyǵys Qazaqstan, Batys Qazaqstan, Qaraǵandy jáne Túrkistan oblystarynyń bilim basqarmalarynda balalardy asyraý boıynsha járdemaqylardy merziminde tólemeý, sondaı-aq qamqorshylarǵa jáne patronattyq tárbıeshilerge aqshalaı qarajatty tolyq kólemde tólemeý faktileri anyqtalǵan.
Bıbigúl Asylova bıyl osyndaı mekemelerge arnalǵan baqylaý paraqtaryn keńeıtý jospary bar ekenin aıtty. Mekemelerde azyq-túlik standarttaryna, kıim úlgisine sáıkestigi qadaǵalanyp, beınebaqylaý kameralarynyń ornatylýy tekseriledi.