Mundaı ortalyqtardyń jas urpaqty saýyqtyrýdaǵy róli zor.
Taldyqorǵan qalasyndaǵy balalardy ońaltý ortalyǵy jumysyn bastaǵan bir jarym jyldyń ishinde tynys joldarynyń patologıasy bar 1 myńnan astam balany saýyqtyrdy. Bul ortalyqtyń, ásirese, indetpen kúres kezinde mańyzy arta tústi, dep habarlaıdy Almaty-akshamy.kz Almaty oblysy ákiminiń baspasóz qyzmetine silteme jasap.
Oblys ortalyǵynda indet jaǵdaıynda balalardyń tynys alý joldaryn emdeıtin ortalyq ashý qajettigi týǵan. Sóıtip, 75 orynǵa arnalǵan ońaltý ortalyǵy 2020 jyldyń tamyz aıynan jumys isteı bastady. Munda tynys joldarynyń syrqaty bar 5-18 jas aralyǵyndaǵy balalar turǵylyqty jeriniń emhanasynan berilgen tıisti joldamamen tegin em qabyldaı alady. Ońaltý ortalyǵynyń qyzmeti balalardyń tynys alý múshelerin qalpyna keltirý men ońaltýǵa baǵyttalǵan.
Balalardy jalpy saýyqtyrý, aǵzanyń kúsh-qýatyn jáne naýqastyń ómir súrý sapasyn joǵarylatý maqsatynda munda men dástúrli ádister men jańa tehnologıalar qatar qoldanady. Atap aıtqanda, dári-dármekpen qatar klımatoterapıa, massaj, emdik dene shynyqtyrý, emdik dýsh, eńbek terapıasy, tuzdy bólme, fızıoterapıa, t.b. prosedýralar jasalady. Bul prosedýralar ÝVCH-terapıa, ÝFO, bıoptron, sharko sebezgisi, kedr bóshkesi, gıdromassaj vanasy sıaqty emdik jabdyqtardyń kómegimen atqaryldy. Tamaqtaný rasıony da saýyqtyrýǵa negizdelgen. Balalardyń bos ýaqyttary psıholog jáne mýzyka mamany túrli oıyndarmen, mýzykalyq sabaqtarmen ushtastyryp, em-sharalaryn bekite túsedi.
«Bizge koronavırýspen, tumaýmen aýyryp shyqqan, bronhıt, astmasy asqynǵan balalar joldanady. Tıisti em-sharalaryn alyp, ońaltýdan ótedi. Ashylǵaly beri myńnan astam balany saýyqtyryp shyǵardyq. Qazirgi kezde ortalyqta 11 bala em qabyldap jatyr», - deıdi mekeme dırektory Sovethan Sársebaeva.
Mamandar búginde balalardyń alergıaǵa beıimdiligi artýyna baılanysty tynys joldarynyń aýrýy da kóbeıe túskenin aıtady. Sondyqtan mundaı ortalyqtardyń jas urpaqty saýyqtyrýdaǵy róli zor.