Jańashyl ǵalym Ǵalymjan Ǵabdireshov mundaı qurylǵy jasaýǵa óz densaýlyǵyna baılanysty jaǵdaı túrtki bolǵanyn aıtty.
Almaty turǵyny zaǵıp jandarǵa saýat ashýǵa arnalǵan trenajer – biregeı Braıl oqý quralyn jasap shyǵardy, dep habarlaıdy Almaty-akshamy.kz «Vechernıı Almaty» basylymyna silteme jasap.
«Kórý qabiletimnen aıyrylyp qalý qaýpi tóngen kezde erekshe qajettilikteri bar adamdarǵa arnalǵan ónertabystarmen aınalysa bastadym. Sosyn múmkindigi shekteýli jandarǵa jańashyldyqtyń qanshalyqty az jasalǵanyn bildim. Meniń alǵashqy ónertabystarymnyń biri – múgedekter arbasyndaǵy adamdarǵa arnalǵan mehanıkalyq ekzoskelet boldy, onyń kómegimen olar júre alady. Sondaı-aq soqyrlar úshin mańyzdy ónertabystar qatarynda belsendi dybysty ajyratýǵa arnalǵan tehnologıalar men apparattar bar, sonyń arqasynda soqyrlarda kórý qyrtysy qaıta belsendirilip, olar jańa jolmen kóre bastaıdy», - deıdi ázirleýshi.
Onyń oıynsha, joba eń aldymen balalarǵa kómektesýi kerek. Yńǵaıly qurylǵynyń arqasynda olar oqýdy jáne álemdi ózinshe zertteýdi úırene alady.
«Soqyrdyń saýsaqtary – onyń kózi deıdi. Al bizdiń qurylǵynyń mindeti – balany saýsaq ushymen taktıldi túrde, budyrlardy tanyp qana qoımaı, áripke aınaldyrýǵa úıretý. Sodan keıin bul áripter maǵynaly sózderge, sodan keıin sóılemderge aınalady. Qurylǵynyń daýystyq kómekshisi balaǵa belsendi túrde kómektesedi, bul oǵan óz betinshe jáne kez kelgen ýaqytta jattyǵýǵa múmkindik beredi. Bul tehnologıanyń kómegimen balalar oqýdy áldeqaıda jyldam úırenedi. Braıldi úırený prosesi óte qıyn, balalar úshin bul birneshe jylǵa sozylýy múmkin. Trenajer óndirisin iske qospas buryn tıflopedagogtarmen bir jyldan astam jumys istegenimiz, olardyń usynystaryn tyńdap alǵanymyz mańyzdy, – deıdi Ǵalymjan Ǵabdireshov.
Ónertabys Qazaqstanda patenttelgen jáne belgili bolǵandaı, álemde mundaı qurylǵynyń analogy joq.
«Álemdik tıflot taýarlaryn baqylaıtyn arnaıy mamandardyń aıtýynsha, bar sheshimderdiń paıdasy shamaly. Mysaly, kóptegen jyldar boıy óndirýshiler qandaı da bir sebeptermen zaǵıptarǵa arnalǵan oqý quraly dep ataıtyn zatty Reseıden tasymaldap alyp keledi. Bul taıaqtardy salýǵa bolatyn alty tesigi bar kádimgi taqta. Biraq, shyn máninde, bul oqý quraly emes, óıtkeni soqyr adamǵa oqý men jazýdy úırený úshin muǵalim qajet bolady. Demek, bizdiń apparat memlekettik qorytyndy boıynsha, alǵashqy tolyqqandy ózdiginen oqý quraly bolyp sanalady», - dep atap ótti ǵalym.