"Balajan" jobasy oń nátıjesin berýde.
Bul týraly Oqý-aǵartý mınıstrliginiń balalar quqyǵyn qorǵaý komıtetiniń bas sarapshysy Janna Sársenbaeva aıtyp berdi, dep habarlaıdy Almaty-akshamy.kz QazAqparatqa silteme jasap.
«Qoldaý ortalyqtaryndaǵy balalardyń psıhologıalyq-emosıonaldy jaǵdaıy men qarym-qatynasy jaqsaryp keledi. Bastysy balalarǵa yńǵaıly. Olar ózderin ınternatta emes, úıde júrgendeı sezinedi. Barlyq bala sekildi, sabaq oqıdy, mektepke barady. Atalǵan joba aıasyndaǵy taǵy bir baǵyt - kásibı patronattyq otbasyny damytý. Iaǵnı jetim jáne ata-ana qamqorlyǵynsyz qalǵan balalardy balalar úıine emes, birden patronattyq otbasyǵa berý múmkindigi. Búginde osy praktıka engizilip jatyr», – dedi Janna Sársenbaeva elordada ótken balalar úıin transformasıalaý máselelerine arnalǵan jıyn barysynda BAQ ókilderiniń saýalyna jaýap bere otyryp.
Mınıstrlik ókiliniń málimdeýinshe, «Balajan» jobasy Aqmola oblysynda pılottyq rejımde júzege asyp jatyr. Alda respýblıkalyq deńgeıde aýqymy keńeıe túsedi.
«Kelesi jyly Aqkól qalasyndaǵy balalardy qoldaý ortalyǵynyń tájirıbesin respýblıkaǵa taratýdy josparlap otyrmyz. Qazir ol jaǵy zańnamalyq deńgeıde pysyqtalýda. Búginde elimizde 20 myńnan astam jetim bala bar. Olardyń 80%-ǵa jýyǵy týysy nemese basqa otbasylarda tárbıelenýde. Jalpy, bala asyrap alý boıynsha elimizde oń dınamıka baıqalady», - deıdi ol.
Buǵan deıin habarlaǵanymyzdaı, Qazaqstanda balalar úıleriniń ataýy men qyzmeti ózgerip jatyr.