Taıaý bolashaqta hımıa salasynda 6 trln teńgege 98 ınvestısıalyq jobany júzege asyrý kózdelip otyr
QR Indýstrıa jáne ınfraqurylymdyq damý mınıstrliginiń málimetinshe, bıyl jalpy somasy 58,1 mlrd teńgege 14 jobany iske qosý josparlanǵan. Oǵan sáıkes, 1040 adam jumys ornymen qamtylyp, onyń 17,6% jáne 14,4% aýyldy jerler men monoqalalardyń úlesine tıesili bolmaq, dep habarlaıdy Almaty-akshamy.kz.
"Byltyr elimizde hımıa salasynda jalpy somasy 54,6 mlrd teńgege 10 joba iske qosyldy. Barlyq joba tolyq qýatyna shyqqan boıda óndiris kólemi shamamen 310 mlrd teńgege jetedi dep kózdelgen. Onyń ishinde eksportqa baǵyttalatyn ónim kólemi 260 mlrd teńgege jáne ımportty almastyrý 60 mlrd teńgege jýyqtaıdy dep mejelenip otyr", - delingen habarlamada.
Quzyrly vedomstvonyń málimetinshe, buǵan qosa, bıyl jalpy somasy 58,1 mlrd teńgege 14 jobany iske qosý josparlanǵan. Atalǵan jobalar arqyly 1040 adam jumys ornymen qamtylyp, onyń 17,6% jáne 14,4% aýyldy jerler men monoqalalardyń úlesine tıesili bolmaq. Barlyq óndiris orny josparlanǵan qýat kólemine tolyq shyqqan kezde óndirilgen ónim mólsheri shamamen 59 mlrd teńgege jetip, onyń ishinde eksport kólemi 11,6 mlrd teńgege, sondaı-aq ımportty almastyrý 47,4 mlrd teńgege artady dep kútilip otyr. Munyń nátıjesinde osy jyly metalýrgıa salasynda emýlsıalyq jarylǵysh zattar men eritkishterdi, sondaı-aq hımıalyq reagentter shyǵaratyn kásiporyndarmen birge jelatın óndiretin zaýyttar ashylady.
Tutastaı alǵanda, taıaý bolashaqta hımıa salasynda 6 trln teńgege 98 ınvestısıalyq jobany júzege asyrý kózdelip otyr. Bul óz kezeginde 13,9 myń turaqty jumys ornyn ashýǵa septigin tıgizedi. Óńirler boıynsha hımıa ónerkásibine baılanysty jobalardyń edáýir bóligi Jambyl oblysyna (16 joba nemese 16,33%) tıesili. Olardyń deni mıneraldy tyńaıtqyshtar men hlor siltili, kálsı hlorıdi, kálsılendirilgen soda syndy beıorganıkalyq hımıa ónimderiniń óndirisine arnalǵan.
Sonymen qatar bul baǵyttaǵy ilkimdi ister Mańǵystaý oblysynda da júzege asyrylyp jatyr. Máselen, munaıly ólkede hımıa óndirisi boıynsha 13 joba (13,27%) qolǵa alynǵan. Atap aıtqanda, bul óńirde jasyl sýtegi, amıak, karbamıd jáne bıoproteın óndiretin óndiris oryndary iske qosylmaq.
Joǵaryda atalǵan jobalardyń kópshiligi amıak, kaýstıkalyq soda, kálsılendirilgen soda sekildi negizgi hımıalyq ónimderdi óndirýge baǵyttalyp, bul hımıa ónerkásibi men basqa da salalardyń damýyna serpin beretini naqtylanady.