Úndístannyń Nyu-Delı qalasynda ótíp jatqan YuNESKO Úkímetaralyq komıtetíníń 20-shy sessıyasynda «Kıíz úıdí jasau jáne qoldanu dástúrí» atalymyn keńeıtu turaly sheshím qabyldandy.
Būl turaly Memlekettík keńesshí Erlan Qarın málím ettí, dep habarlaıdy Aqshamnews.kz.
Onyń aıtuynsha, Qazaqstannyń "Salburyn" ūlttyq ótínímí jáne "Keste tígu ónerí", "Alpamys jyry", taqıya atalymdary YuNESKO-nyń qarauynda.
"Úndístannyń Nyu-Delı qalasynda ótíp jatqan YuNESKO Úkímetaralyq komıtetíníń 20-shy sessıyasynda «Kıíz úıdí jasau jáne qoldanu dástúrí» atalymyn keńeıtu turaly sheshím qabyldandy. Ony bedeldí tízímge 2014 jyly Qazaqstan men Qyrǵyzstan engízgen bolatyn. Būl kıíz úıdí álemdík mádenıettíń bír bólshegí retínde tanu múmkíndígín arttyrady jáne Ortalyq Azıya mūrasynyń ortaq ekenín aıǵaqtaıdy.
Qazaqstan osyǵan deıín YuNESKO-nyń materıaldyq emes mádenı mūralarynyń reprezentatıvtí tízímíne 14 atalym qosqan bolatyn. Elímíz atalǵan kórsetkísh boıynsha 183 memlekettíń íshínde úzdík 25 eldíń qatarynda tūr.
Sonymen qatar qazírgí tańda Qazaqstannyń «Salburyn» ūlttyq ótínímí jáne «Keste tígu ónerí» (Qazaqstan, Ózbekstan, Tájíkstan), «Kıíz basu ónerí» (Qazaqstan, Qyrǵyzstan, Ázerbaıjan, Iran, Mońǵolıya, Tájíkstan, Túrkıya, Ózbekstan), «Alpamys jyry» (Qazaqstan, Ázerbaıjan, Túrkímenstan, Túrkıya, Ózbekstan), «Taqıya» (Qazaqstan, Túrkímenstan, Ázerbaıjan, Qyrǵyzstan, Tájíkstan, Ózbekstan, Túrkıya) atalymdary YuNESKO-nyń qarauynda ekenín aıta ketken jón", - dedí E. Qarın.