Eldegi teri óndirýshiler ıleýge qajetti iri qara maldyń terisin tappaı turalap qalǵan.
Sebebi myńdaǵan dana sıyr terisi syrt elderge shıkizat retinde ketedi. Al qoıdyń terisi bolsa, shetelge ótpeıdi. Amaly qalmaǵan sharýalar shıkizatty qoqysqa tastaıdy, dep habarlaıdy Almaty-akshamy.kz
Buryn usaq mal terisinen de tabys taýyp kelgen sharýalar qazir ony tıynǵa bolsa da alatyn adam tappaı álek. Tyǵyryqqa tirelgen teri óndirýshiler men sharýalar bılikten kómek suraıdy.
Taý bolyp úıilgen terini qoqys polıgonyna jóneltedi. Aınala ólekse sasymas úshin, teri tógilgen jerdi kún saıyn órtep turýǵa týra keledi. Mal terisi buryn tabystyń bir kózi bolsa, búginde sharýalarǵa qosymsha júk bolyp tur.
«Terisi eshkimge kerek bolmaǵannan keıin kúndelikti qoqysqa ketedi. Alyp jatqan eshkim joq. Qabyldap jatqan esh jer joq. Osy aımaqta qansha osyndaı sharýalar bar. Báriniki qoqysta jatyr», - deıdi Qozybaı Atbaǵarov esimdi sharýa.
Otandyq óndirýshiler de qoı terisin óńdeýge qulyqsyz. Óıtkeni odan jasalǵan jartylaı fabrıkatqa shetelden suranys joq. Al, elimizde ılengen qoı terisinen buıym jasaıtyn otandyq kásiporyn joq. Esesine jylyna elimizde eki jarym mln danadan astam iri qara mal terisi jınalady. Onyń ózin deldaldar aqshasy úshin shetel asyrýǵa beıimdelip alǵan.
«Aýsylǵa baılanysty terini Reseıge shyǵarmaıtyn. Endi qazir aýsyldyń karantın ýaqyty bitip, shekara ashylǵannan keıin teriniń barlyǵy sol Reseıdiń tarapyna qaraı aqyryn aýyp ketip jatyr. Sol sebepti men tikeleı ózime qatysty alatyn bolsam, zaýytta qazir teri joq. Teri bolmaǵan soń, zaýytymyz toqtap tur», - deıdi Qazaqstandaǵy Teri óndirýshiler qaýymdastyǵynyń tóraǵasy Nurman Núptekeev.
Elimizde iri qara mal terisin óńdeıtin irili-usaqty 10 kásiporyn bar. Olardyń kópshiligi birde istep, birde toqtap tur. Biriniń tozyǵy jetse, birine shıkizat jetispeıdi. Al, osy ýaqyt aralyǵynda daıyn teriden buıym jasaıtyn óndiris oryny iske qosylmapty. Qazir teri óndirý salasynyń fýksıalaryn Indýstrıa mınıstrliginen Aýyl sharýashylyǵy mınıstrligine tolyq ótkizý jumystary júrýde.
«Elimizde bylǵarydan buıym jasaıtyn kásiporynnyń naryqtaǵy úlesi nebári 4 paıyzdy ǵana quraıdy. Qazir bizde eki zaýyt tolyq jumys istep tur. Onyń ózi keńestik kezeńnen qalyp, qaıta jóndeýden ótkender. Al, jańa óndiris oryny ashylmady», - deıdi QR IIDM Aýylsharýashylyǵy óndirisi basqarmasynyń sarapshysy Aıgerim Isabekova.
Qazir Teri óndirýshiler qaýymdastyǵy men Aýyl sharýashylyǵy mınıstrligi teriden jelatın jasaıtyn zaýyt qurylysyn júrgizý úshin kelissózder júrgizýde. Sabaqty ıne sátimen shyqsa, eldegi búkil mal terisi tamaq óndirisine baǵyttalmaq.