QR Ekologıa jáne tabıǵı resýrstar mınıstri Erlan Nysanbaevtyń aıtýynsha, 2973 turmystyq qatty qaldyqtar (TQQ) polıgony tirkelgen, onyń ishinde tek 608 polıgonnyń tıisti jobalyq jáne ruqsat qujattary bar, bul jalpy sanynyń 20,4%-yn ǵana quraıdy, dep habarlaıdy aqshamnews.kz
"Atyraý, Batys Qazaqstan, Túrkistan, Soltústik Qazaqstan oblystarynyń, sondaı-aq Shymkent qalasynyń oblys ortalyqtaryndaǵy polıgondar 90%-dan astam tolǵan, Astanada – 98%, al Jezqazǵanda – múlde lyq toly", – dedi Erlan Nysanbaev.
2023 jyly Úkimet 100 jańa polıgon salý, 8 qoldanystaǵy polıgonnyń qýattylyǵyn arttyrý jáne 5 polıgondy rekýltıvasıalaý boıynsha keshendi is-sharalar josparyn bekitti.
Alaıda qazirgi tańda, ákimdikter tek 7 polıgon salyp, iske qosty. 23 polıgon boıynsha jobalyq-smetalyq qujattama (JSQ) daıyndaldy, al 18 polıgon boıynsha qujattama ázirlený ústinde.
"Al qalǵan 52 polıgon boıynsha ákimdikter eshqandaı jumys júrgizbegen. Abaı oblysy boıynsha – 22 polıgon, Aqmola oblysy – 4 polıgon, Soltústik Qazaqstan oblysy – 8 polıgon boıynsha qujattardyń merzimi ótip ketken, al túzetý jumystary múlde josparlanbaǵan. Jalpy alǵanda, jańa alańdar salynbaı jatyr, sebebi qarjylandyrý joq. Osyǵan baılanysty mınıstrlik qoqysty ýtılızasıalaýdan túsetin qarajat esebinen polıgondar salýǵa qarjy bólý máselesin qarastyrdy. Bul 11 óńirde jalpy quny 53 mlrd teńge bolatyn 43 polıgondy qarjylandyrýǵa múmkindik beredi", – dedi mınıstr.
Onyń dereginshe, elde jyl saıyn 4,5 mıllıon tonnadan astam komýnaldyq qaldyq túziledi, al 2024 jyly olardy óńdeý deńgeıi – 25,8% ǵana bolǵan.