Týrızm men ekotýrızmdi turaqty damytý baǵdarlamasy aıasynda Almatynyń taýly bókterindegi tabıǵaty ásem Gorelnık shatqalynda salynyp jatqan zamanaýı Arman-köpir dep atalatyn jaıaý júrginshiler kópiriniń qurylysy aıaqtalýǵa jaqyn. Nysan jospar boıynsha bıyl qyrkúıek aıynda paıdalanýǵa beriledi.
Uzyndyǵy 77 metr bolatyn kópir shatqaldyń eki jaǵyn qosyp, bolashaqta ashylatyn oqýshylarǵa arnalǵan «Myń bala» sport klýbyna qoljetimdilikti qamtamasyz etedi. Kópirdiń qurylysy jer bederiniń kúrdeliligin eskere otyryp jasalǵan, onyń beriktigi men senimdiligi joǵary, halyqaralyq qaýipsizdik jáne paıdalaný standarttaryna saı keledi. Joba jekemenshik kompanıa bastamasymen, Eýropanyń taýly jáne qorǵalatyn aımaqtarynda aspaly kópir salýda kópjyldyq tájirıbesi bar Shveısarıanyń Swissrope Ltd kompanıasymen birlese júzege asyrylyp otyr.
Kópirge jaqyn mańda 912 m² aýmaqty qamtıtyn kópfýnksıonaldy sport zaly men balalarǵa, sporttyq toptarǵa jáne oqý-jattyǵý jıyndaryna qatysýshylarǵa arnalǵan jaıly 12 modýldi kapsýla paıda bolady. Jańa keshen jyl boıy belsendi demalys, sporttyq jattyǵýlar men tabıǵat aıasyndaǵy bilim berý baǵdarlamalary úshin alańǵa aınalady.
Eske sala keteıik, bıyl kóktemde Gorelnık aýmaǵynda vızıt ortalyqqa aparatyn «Jumbaq jol» jaıaý júrginshiler joly ashylǵan edi. Uzyndyǵy 285 metr bolatyn soqpaq jol arqyly demalys aımaqtaryna barýǵa bolady, túngi jaryq jáne aqparattyq stendter bar. Joba ekotýrızmdi damytýǵa jáne Medeý men Shymbulaq sıaqty tanymal baǵyttarǵa túsetin rekreasıalyq júktemeni azaıtýǵa baǵyttalǵan.
Bul bastamalardy júzege asyrý jaıly ári qaýipsiz týrısik orta qurýǵa, belsendi jáne tanymdyq demalys múmkindikterin keńeıtýge, sondaı-aq tabıǵı murany saqtaýǵa yqpal etedi.