Ulttyq qordyń aktıvteri $4 mlrd-qa ósken.
Úkimet 2024 jyly el ekonomıkasy keminde 5,3% deńgeıinde ósedi dep boljap otyr, dep habarlaıdy Almaty-akshamy.kz Úkimettiń resmı resýrsyna silteme jasap.
Ótken jyldyń qorytyndysyna sáıkes el ekonomıkasy jańa jaǵdaılarǵa beıimdelip, ornyqty damý jolyna tústi.
Qabyldanǵan sharalar nátıjesinde ekonomıkanyń ósimi 5,1%-dy qurady.
Negizgi salalardyń barlyǵy oń dınamıka kórsetti:
qurylysta – 13,3%;
saýdada – 11,3%;
aqparat jáne baılanys qyzmetteri – 7,1%;
kólik qyzmeti – 6,9%;
ónerkásip – 4,3%.
Negizgi kapıtalǵa salynǵan ınvestısıa 13,7%-ǵa ósti.
Bul rette 2023 jyldyń 9 aıynda tikeleı sheteldik ınvestısıa (TSHI) kólemi $19,7 mlrd-ty qurady.
Onyń ishinde $11 mlrd-tan astamy shıkizattyq emes sektorlarǵa baǵyttalǵan.
Jalpy 2 jyl qatarynan TSHI kórsetkishteri sońǵy onjyldyqtaǵy eń joǵary kórsetkishterdiń birine aınaldy – olardyń jyldyq kólemi $26-28 mlrd deńgeıinde.
Qazaqstan TMD elderi arasynda sheteldik ınvestısıalardyń jalpy aǵyny boıynsha kósh bastap tur.
2023 jyldyń 11 aıynda syrtqy saýda aınalymy 2,2%-ǵa ósip, $126 mlrd-ty qurady.
Oń saýda balansy $16 mlrd-tan asty.
Shıkizattyq emes eksport nomenklatýrasy 141 pozısıaǵa ósti.
Elimizdiń halyqaralyq rezervteri $96 mlrd-ty qurady, onyń ishinde Ulttyq qordyń aktıvteri $4 mlrd-qa ósip, $60 mlrd-tan asty.
Halyqaralyq reıtıńtik agenttikter Qazaqstan ekonomıkasynyń táýelsiz reıtıńi men ınvestısıalyq senimdiligin rastady.
Úkimet Ulttyq bankpen jáne jergilikti atqarýshy organdarmen birlesip ınflásıany baqylaý jáne tómendetý jónindegi keshendi sharalardy iske asyrýda.
Nátıjesinde ótken jyly ol 2 eseden astam tómendep, 9,8%-dy qurady.
2024 jyly ınflásıany 6-8% deńgeıinde ustaý mindeti qoıyldy.
2024 jyldyń qorytyndysy boıynsha ekonomıkanyń ósýi 5,3%-dan kem bolmaýy tıis.
Úkimet Memleket basshysynyń Saılaýaldy baǵdarlamasy men Qazaqstan halqyna joldaýlarynda belgilengen mindetterdi iske asyrýdy jalǵastyrýda. Atalǵan jumys ekonomıkany belsendi ártaraptandyrýǵa, kásipkerlikti damytýǵa, ınvestısıa tartýǵa jáne azamattardyń ál-aýqatyn edáýir jaqsartýǵa baǵyttalǵan. Munyń bári 2029 jylǵa qaraı JİÓ-ni eki esege arttyrýǵa berik negiz bolady.