Qazaqstannyń ekonomıkalyq damýynda qaıta óńdeý salalaryna basymdyq berý — ýaqyt talaby.
Ekonomıs Ilás Isaevtyń aıtýynsha, eldiń negizgi ekonomıkalyq salalarynda oń ózgerister baıqalyp otyr, alaıda shıkizatqa táýeldilikti azaıtyp, qosylǵan quny joǵary ónimder óndirisine kóshý qajet.
«Bizge aýyl sharýashylyǵynda, ónerkásip salasynda qaıta óńdeý salalaryn damytý qajet. Shıkizatty, taý-ken, qazba baılyqtaryn eksporttaı bermeı, qosylǵan quny joǵary daıyn ónimderdi shyǵaryp eksporttaǵan durys», — deıdi sarapshy.
Agroónerkásip kesheni: rekord jáne nátıje
Keıingi jyldary agroónerkásip kesheninde aıtarlyqtaı serpilis bar. 2024 jyly bul sala 13,7%-ǵa ósip, salalar arasyndaǵy eń joǵary kórsetkishke qol jetkizdi. Dándi daqyldar kólemi 26,8 mıllıon tonna bolyp, ónimdilik 16,2 sentnerge deıin artty. Bul — keıingi 12 jyldaǵy rekord kórsetkish.
Bul jetistikter mıneraldy tyńaıtqyshtardy qoldaný kóleminiń 1,3 mln tonnaǵa deıin artýy men elıtalyq tuqymdardy paıdalaný deńgeıiniń 9,5%-ǵa deıin jetýi arqyly múmkin boldy. Sonymen qatar, 470 myń gektarǵa sý únemdeý tehnologıalary engizildi — bul klımattyq táýekelderge beıimdilikti arttyra túsedi.
«Agroónerkásip kesheni osy baǵytta jaqsy damyp keledi. Sol sıaqty munaıdy qaıta tereń óńdeý, gazdy tereń óńdeý salalary qolǵa alyndy, qaıta óńdeý salalaryna shet el ınvestısıalary tartylýda», — deıdi Isaev.
2024 jyly jalpy somasy 276,7 mlrd teńge bolatyn 286 ınvestısıalyq joba júzege asty. Al 2025 jyldyń qorytyndysy boıynsha aýyl sharýashylyǵy óniminiń jalpy kólemi 8,5 trln teńge bolady dep kútiledi.
Importty azaıtyp, otandyq ónimdi arttyrý
Sarapshynyń pikirinshe, basty nazar — ishki naryqty otandyq daıyn ónimmen qamtamasyz etý jáne ımporttyq táýeldilikti azaıtý.
«Bizdiń tutyný naryǵymyzdaǵy ımportty azaıtýymyz kerek. Osy baǵytta Úkimet óte aýqymdy jumystar atqaryp jatyr. Ónerkásip salasynda qaıta óńdeý kásiporyndaryn salý — bul da kezek kúttirmeıtin sharýa», — deıdi ekonomıs.
Daıyn astyq, mal jáne et ónimderin shıki kúıinde eksporttaı bermeı, olardy tereń óńdep, joǵary sapaly daıyn ónim retinde syrtqy naryqqa shyǵarý – Qazaqstannyń keleshek ekonomıkalyq strategıasynyń mańyzdy bóligi.
«Osylaısha ishki naryǵymyzdy otandyq daıyn ónimdermen tolyqtyramyz, ımportty almastyramyz, memlekettik búdjettiń kirisi artady», — dep qorytyndylaıdy Ilás Isaev.