Qarjy sarapshysy Baqytjan Sárkeev Memleket basshysy Qasym-Jomart Toqaevtyń tóraǵalyǵymen ótken Úkimettiń keńeıtilgen otyrysynda aıtylǵan tapsyrmalardy joǵary baǵalady. Sarapshynyń pikirinshe, halyqtyń áleýmettik jaǵdaıyn jaqsartý birinshi kezektegi mindet bolyp qala beredi.
Ekinshi deńgeıli bankterdiń jaýapkershiligi:
– «Bir kezderi ekinshi deńgeıli bankterge mol qarajat berildi. Olar memleket esebinen kún kórdi desek, artyq emes. Endi olardyń halyq ıgiligi úshin jumys isteıtin kezi keldi. Eger bankter sharýashylyq sýbektilerine naqty qoldaý kórsetip, tómen paıyzben nesıe berse, kóptegen áleýmettik jáne ekonomıkalyq másele ózdiginen sheshiledi», – dedi Sárkeev.
Dollar baǵamyn turaqtandyrý joldary:
Sarapshy dollar baǵamynyń 500 teńgeden asyp ketýin sheshýdiń tıimdi jolyn – ekonomıkany ártaraptandyrýdy usynady.
– «Óndiris oryndaryn, zaýyttar men fabrıkalardy kóbeıtý arqyly biz ekonomıkalyq turaqtylyqqa qol jetkizemiz. Elimiz munaı, gaz, ýran, kómir, temir, mys jáne myrysh sıaqty resýrstarǵa baı. Biraq olardy shıkizat kúıinde emes, tereń óńdep, shetelge eksporttaý qajet. Bul ulttyq ekonomıkany nyǵaıtyp, teńge baǵamyn turaqtandyrýǵa yqpal etedi», – dedi ol.
Jasaıtyn isti keıinge qaldyrmaý:
Sárkeevtiń pikirinshe, Qazaqstannyń áleýmettik-ekonomıkalyq máselelerin sheshý úshin áreket etý ýaqyty – dál qazir.
– «Birlesip atqaratyn jaqsy isterdi erteńge qaldyrmaı, búginnen bastaǵan jón. Halyqtyń ál-aýqatyn jaqsartýǵa baǵyttalǵan árbir bastama mańyzdy», – dedi sarapshy.