Ulybrıtanıanyń Bilim jónindegi Memlekettik hatshysy Djıllıan Kıgannyń shaqyrýymen Qazaqstan Respýblıkasynyń Ǵylym jáne joǵary bilim mınıstri S.Nurbek Londonda ótken 19-shy jyl saıynǵy Dúnıejúzilik bilim forýmyna qatysty, dep habarlaıdy Almaty-akshamy.kz.
Forým alańynda Mınıstr S.Nurbek Indonezıanyń bilim, mádenıet, zertteýler jáne tehnologıalar mınıstri Nadım Makarımmen, Gonkongtiń Bilim mınıstri Christine Choi Yuk-lin-men, Ázerbaıjan Respýblıkasynyń Ǵylym jáne bilim mınıstri Emın Amrýllaevpen syndarly kelissózder ótkizdi. Kezdesý barysynda taraptar jetekshilik etetin salalardaǵy ekijaqty qatynastardy nyǵaıtýdyń ózekti máseleleri boıynsha pikir almasty.
Vedomstvo basshysy Dúnıejúzilik bank tobynyń bilim berý salasyndaǵy jahandyq tájirıbe jetekshisi Jaime Saavedra, Bilim jáne daǵdylar jónindegi dırektory, EYDU Bas hatshysynyń bilim berý salasyndaǵy saıasat máseleleri jónindegi arnaıy keńesshisi Andreas Schleicher, YÖK prezıdentiniń keńesshisi (Túrkıanyń joǵary bilim keńesi) Mustafa Turker Ari-men kelissózder júrgizdi.
Sondaı-aq, Saıasat Nurbek Dúnıejúzilik forým aıasynda Educational Testing Service kompanıasynyń prezıdenti jáne bas atqarýshy dırektory Amıt Sevakpen kezdesti. Kelissózder nátıjesinde QR Ǵylym jáne joǵary bilim mınıstrligi men ETS arasynda ózara túsinistik týraly memorandýmǵa qol qoıyldy. Ol ETS-tiń jańa test ortalyqtaryn ashý josparyn bekitip qana qoımaı, yntymaqtastyqtyń basqa da baǵyttaryn, onyń ishinde aǵylshyn tilin oqytý ádistemesin damytýdy da aıqyndaıdy.