Jeńis kúnine arnalǵan drondar shoýyn tamashalaýǵa Abaı alańyna 60 myńnan astam adam jınaldy.
9 mamyr kúni Almatyda Jeńistiń 80 jyldyǵyna arnalǵan aýqymdy drondar shoýy bolyp ótti. Bul áserli kórinis merekeniń sharyqtaý shegi. Osy sátte 500-den astam dron kókke kóterilip, jaryq pen anımasıa arqyly erlik pen janqıarlyqty, este qalǵan erlikke toly sátterdi baıandady. Shoý ótken Abaı alańyna 60 myńnan astam qala turǵyny jınaldy. Sondaı-aq, «Almaty» telearnasynyń YouTube-arnasynda tikeleı efır uıymdastyryldy, dep habarlaıdy aqshamnews.kz
Shoýdyń ashylý sátinde «80 • 1941–1945» degen jazýy bar juldyz paıda boldy – bul erliktiń sımvoly ári uly jeńis jyldaryn eske salatyn belgi. Odan keıin aspanda jaýynger kaskasy men qyzyl qalampyrlar beınelenip, soǵysta qaza tapqandarǵa qurmet kórsetildi. Eń áserli kórinistiń biri – soǵystan oralmaǵan sarbazdardyń rýhyn beıneleıtin ushyp bara jatqan tyrnalar kompozısıasy boldy.
Shoýdyń mańyzdy bóligi qazaqstandyq qaharmandarǵa arnaldy. Aty ańyzǵa aınalǵan Mánshúk Mámetova men Álıa Moldaǵulovanyń kezegi kelgende, Mánshúk – pýlemetpen, Álıa – myltyqpen shyqty. Sondaı-aq, jaýyngerlik ushaqpen turǵan áıgili ushqysh Talǵat Bıgeldınovtyń beınesi de boldy arasynda. Halyq qaharmany, qolbasshy ári jazýshy Baýyrjan Momyshulynyń tulǵasy batyrlyq pen qaısarlyqtyń sımvoly retinde jaryqqa shyqty.
Budan ózge kórinisterde Jeńis týynyń kóterilý sáti, juldyz pishinindegi Máńgilik alaý men «Eshkim de, eshqashan da umytylmaıdy!» degen jazý beınelendi. Shoýdyń aqtyq sátinde qazaqy oıýmen kómkerilgen kompozısıa men jarqyraǵan «Jeńis kúni qutty bolsyn!» degen jazý kórermenderdi erekshe áserge bóledi.
Bul jaryq shoý – eske alý sharasy ǵana emes, tarıhı murany jańa býynǵa jetkizýdiń jańa tásili. Ol tarıhty umytpaı, oǵan maqtanyshpen qaraý kerektigin eske saldy.
Kórermenderge Abaı alańynda, «Qazaqstan» qonaqúıi janynda, Caspian University mańynda jáne Abaı dańǵyly boıynda arnaýly alańdar daıarlandy. Shoý kezinde qala ortalyǵyndaǵy kólik qozǵalysy ýaqytsha shekteldi.
Almatydaǵy drondar shoýy Jeńis kúnin atap ótýdiń jarqyn ári este qalarlyq sátine aınaldy. Shoýdyń áserin kúsheıtken áskerı jyldardaǵy ánder men patrıottyq áýender ár kórinistiń emosıalyq qýatyn arttyryp, kórermenderdiń kókeıine maqtanysh sezimin uıalatty.