10 tamyzda Almatyda ótetin álemdik pop-dıva Djennıfer Lopestiń konserti tek mýzyka súıer qaýym úshin ǵana emes, qala mádenıeti men qoǵamdyq tártipti saqtaý turǵysynan da mańyzdy shara bolmaq. Uıymdastyrýshylar men qala ákimdigi konsertke keletin árbir kórermendi tazalyq saqtaýǵa jáne qalamyzǵa qurmetpen qaraýǵa shaqyryp otyr.
Konsert ótetin Ortalyq stadıon aýmaǵynda sanıtarlyq jaǵdaıǵa erekshe nazar aýdarylǵan. İs-shara aldynda «Taza Qazaqstan» aksıasy aıasynda aýmaq tolyq tazartylyp, qoqys jáshikteri men arnaıy qaldyq jınalatyn oryndar kóbeıtildi. Shara barysynda da eriktiler tazalyqty qadaǵalap, qonaqtarǵa qajet bolǵan jaǵdaıda baǵyt-baǵdar beredi.
Uıymdastyrýshylardyń aıtýynsha, kórermenderdiń mádenıeti – Almatynyń halyqaralyq ımıjiniń bir bóligi.
«Álemdik juldyzdyń konsertine kelgen ár adam óziniń tártibimen jáne qorshaǵan ortaǵa degen jaýapkershiligimen erekshelenýi kerek», – deıdi olar.
Kórermenderge qoqysty arnaıy jáshikterge tastaý, qoǵamdyq múlikke zıan keltirmeý, jasyl jelekterdi qorǵaý syndy qarapaıym, biraq mańyzdy erejeler eskertildi. Bul qadamdar úlken is-sharalar kezinde qalanyń tazalyǵyn saqtap, turǵyndar men qonaqtar úshin jaıly orta qalyptastyrýǵa kómektesedi.
Mádenıetti kórermen – esteqalarlyq merekeniń ajyramas bóligi. Sondyqtan Djennıfer Lopes shoýy tek jarqyn ónerimen ǵana emes, qalaǵa degen qurmet pen ekologıalyq jaýapkershilik úlgisimen de este qalýy tıis.