Almatydaǵy Botanıkalyq baqta aqqýdy moınynan qylqyndyrǵan 1983 jylǵy er adam bir táýliktiń ishinde anyqtalyp, ustaldy. Keıin sot oǵan jeti táýlikke ákimshilik qamaý jazasyn taǵaıyndady, dep habarlaıdy Aqshamnews.kz Botanıkalyq baqtyń baspasóz qyzmetine silteme jasap.
5 tamyzda áleýmettik jelilerde er adamnyń Botanıkalyq baq aýmaǵynda aqqýdy moınynan qylqyndyrǵan sáti túsirilgen vıdeo taraǵan. Bul jaǵdaı qoǵamnyń ashý-yzasyn týdyrdy. Polısıanyń jedel áreketi men baq qaýipsizdik qyzmeti bergen beınebaqylaý derekteri arqasynda quqyq buzýshy anyqtalyp, ustaldy.
Almaty qalalyq sotynyń málimetinshe, búgin ótken sot otyrysynda er adamǵa jeti táýlikke ákimshilik qamaý jazasy kesildi.
Botanıkalyq baq ákimshiligi baq aýmaǵy erekshe qorǵalatyn tabıǵı aımaq ekenin, mundaǵy janýarlar men ósimdikterdiń arnaıy qorǵaýda bolatynyn eske saldy. Aqqýdyń jaǵdaıyn ornıtolog mamandar turaqty dep baǵalady. Jaqyn ýaqytta aqqýlar toǵanynyń aınalasyna qorshaý ornatý josparlanyp otyr.
Sondaı-aq, baqta kelýshiler sanynyń artýyna baılanysty erejeni buzý oqıǵalary da kóbeıgen: kógaldy taptaý, ósimdikterdi zaqymdaý, qoqys tastaý, ruqsatsyz pıknık ótkizý. Tártipti saqtaý úshin ákimshilik «Jasyl Patrúl» eriktileriniń kómegine júginýdi josparlap otyr.