Almaty ákimi Darhan Satybaldy aýdan ákimdigi, tıisti basqarmalar, komýnaldyq qyzmet pen baǵynysty uıymdar ókilderiniń qatysýymen Áýezov aýdanynda keńes ótkizdi, dep habarlaıdy Aqshamnews.kz.
Negizgi máselelerdiń biri «Saıran» avtovokzaly men «Car City» saýda ortalyǵy mańyndaǵy jaǵdaı. Munda jekemenshik taksılerdiń turaqty jınalýy turǵyndardyń narazylyǵyn týǵyzyp, shý, sanıtarlyq talaptardyń saqtalmaýy jáne keshki mezgilde qaýipsizdiktiń tómendeýi syndy máselelerge sebep bolyp otyr.
Darhan Satybaldy aýdandyq polısıa basqarmasyna patrúldeý jumysyn kúsheıtip, atalǵan nysandardyń mańyndaǵy tártipti retteýdi tapsyrdy.
Áýezov – Almatydaǵy halyq eń tyǵyz qonystanǵan aýdandardyń biri, mundaǵy turǵyn úılerdiń kópshiligi keńes dáýirinde salynǵan. 2025 jyly munda 37 kópqabatty úıdiń qasbeti kúrdeli jóndeýden ótpek.
Almaty ákiminiń aıtýynsha, jumystardy júrgizý kezinde biryńǵaı sáýlettik standartty saqtaý mańyzdy, bul qalanyń úılesimdi kelbetin qalyptastyrýǵa yqpal etedi.
«Búkil qalaǵa qoldanýǵa bolatyn sheshim qabyldaýymyz qajet. Qazir Almatynyń segiz aýdanynda ákimder jobalardy óz betinshe júzege asyryp jatyr. Bizge biryńǵaı tásil kerek», – dedi Darhan Satybaldy.
Sondaı-aq, Áýezov aýdanynda qoǵamdyq keńistikterdi damytý mindeti tur. Bastapqyda bul aýdan «turǵyn» retinde jobalanǵandyqtan, ýaqyt óte kele munda saıabaq pen skverler tapshylyǵy týyndady. Búginde bir ǵana jekemenshik saıabaq jumys isteıdi. Tıisti basqarmalarmen birlesip, saıabaqtar men jasyl jelekterdi kóbeıtý jobalary qarastyrylýda.
Injenerlik ınfraqurylym qurylysy, taratý jylý jelilerin qaıta jańǵyrtý, syrtqy jaryqtandyrý jelilerin jańartý jalǵasyp, kóptep aǵash otyrǵyzý men aýlalar keshendi abattandyrý jumystary qolǵa alynǵan.
«Aýdandy damytý kerek. Júzege asqan jobany turǵyndar ony kórip, baǵalaýǵa tıis. Júrgizilgen jumystardyń nátıjesi keminde 15 jyl saqtalyp, bul merzim ishinde qaıta jóndeý qajettiligi týmaýy kerek», – dedi Darhan Satybaldy.
Keńes aıasynda Almaty ákimi Áýezov aýdany turǵyndaryn jeke qabyldady. Memlekettik baǵdarlama aıasynda shatyrlardy kúrdeli jóndeý, memlekettik jaldamaly turǵyn úı berý, sondaı-aq, ınklúzıa, jumyspen qamtý, halyqtyń áleýmettik osal toptaryn qoldaý jáne ataýly áleýmettik kómek alý máseleleri talqylandy. Turǵyndarǵa túsinikteme berilip, árbir ótinish boıynsha naqty is-sharalar men oryndaý merzimi belgilendi.