«Amazon» kompanıasynyń negizin qalaýshy mıllıarder Djef Bezos Afrıkadaǵy tabıǵatty qalpyna keltirip, azyq-túlik júıesin jetildirýge 2 mıllıard dollar bóledi. Bul týraly kásipker Glazgodaǵy konferensıada jarıalady - dep habarlaıdy almaty-akshamy.kz
Qomaqty qarjynyń 1 mıllıardy qara qurlyqta taldar egip, tozǵan landshaftardy qalpyna keltirýge bólinbek. Qalǵany egistik shyǵymyn arttyratyn sharýashylyqtardy keńeıtip, ónimderdi turaqty jetkizý júıesin qurýǵa jumsalmaq. Bezos, sondaı-aq Amazon 2040 jylǵa taman kómirqyshqyl gazyn shyǵarýdy tolyq toqtatýǵa nıetti ekenin atap ótti. Al 2025 jylǵa qaraı birlestik barlyq operasıasyn jańǵyrtylatyn qýat kózderin paıdalaný arqyly júzege asyrýǵa kóshpek.
– Bezostyń Jer qory kelesi jyly ótetin kezekti konferensıaǵa deıin Afrıkadaǵy tabıǵatty qalpyna keltirýge baǵyttalǵan strategıany jasaýǵa daıyn bolady. Biraq biz klımattyq daǵdarysty sheshý úshin tek ár eldegi úkimet men uıymdarǵa nemese qaıyrymdylyq qorlaryna ǵana súıene almaımyz. Kómirqyshqyl gazyn qysqartý isine jekemenshik sektor da belsene atsalysýy tıis - dedi Amazon kompanıasynyń negizin qalaýshy Djeff Bezos.
Rokfeller áýleti men Bezos qory jáne IKEA kompanıasy ǵalamshar úshin álemdik energetıkalyq aláns quratynyn jarıalady. Onyń maqsaty túrli uıymdardyń qaıyrymdylyq qarjysyn jınap, kedeı elderdiń balamaly energıa kózderine ótýin qarjylandyrý. Aláns aldaǵy 5 jylda bul jobaǵa 50 mıllıard dollar bólip, al 10 jylda onyń kólemin 100 mıllıard dollarǵa deıin jetkizýdi kózdep otyr.