Qazaqstanda «Voice Beyond Horizon» dep atalatyn aýqymdy telejobanyń túsirilimi bastalady, dep habarlaıdy aqshamnews.kz
Mýzykalyq shoýdy Dımash Qudaıbergen jáne álemdegi iri medıaholdıngterdiń birine aınalǵan Qytaıdyń Hunan TV telearnasy birlese júzege asyrady.
Joba ártúrli elderden kelgen oryndaýshylardy biriktiredi. Onyń ishinde Qytaı, Qyrǵyzstan, Italıa, Túrkıa jáne Serbıa ókilderi bar. Olar Dımashpen birge Qazaqstannyń kórkem óńirlerine shyǵarmashylyq saparǵa attanady.
Túsirilim Astana men Almaty qalalarynda, Almaty, Aqmola, Túrkistan jáne Mańǵystaý oblystarynda ótedi. Realıtı-shoýdyń aqtyq kezeńi elordada uıymdastyrylady.
Qatysýshylar poıyzben jolǵa shyǵyp, eldiń tabıǵı jáne tarıhı nysandarynda toqtaıdy. Negizgi aıaldamalar qatarynda Kóbeıtuz kóli, Sharyn men Bozjyra shatqaldary, Saıram-Ógem ulttyq parki bar.
Mýzykanttar óner kórsetedi, sheberlik saǵattaryn ótkizip, birlesken perfomanstarda sheberlikterin pash etedi. Jeke jáne dýet túrindegi oryndaýlardy halyqaralyq deńgeıdegi kásibı qazylar baǵalaıdy.
Baǵdarlama Hunan TV telearnasy men Mango TV sıfrlyq platformasynda kórsetiledi. Olardyń Qytaı men ózge elderdegi aýdıtorıasy 1 mıllıardtan astam kórermendi qamtıdy.
«Voice Beyond Horizon» jobasy Qazaqstannyń mádenı murasy men týrısik áleýetin álemdik arenada ilgeriletýde mańyzdy bastamaǵa aınalmaq.