Dımash Berlınde alǵash ret jeke konsert ótkizdi: «Stranger» álemdik týry Germanıada jalǵasty, dep habarlaıdy Aqshamnews.kz tilshisi.
14 qarashada Germanıa astanasy Berlınde Dımash Qudaıbergenniń jeke konserti ótti. Bul – qazaqstandyq ánshiniń Berlındegi alǵashqy óner kórsetýi. Buǵan deıin ol 2022 jáne 2024 jyldary Dússeldorfta konsert bergen.
Max-Schmeling-Halle arenasynda Dımash 20-dan astam kompozısıa oryndady. Olardyń ishinde on avtorlyq áni de boldy. Keshtiń basty shyǵarmalarynyń biri retinde árdaıym aıtylatyn «Umytylmas kún» taǵy da kórermenniń erekshe yqylasyna bólendi. Bul án 2016 jylǵy alǵashqy týrynyń ataýyna aınalǵan jáne sodan beri ár konserttiń ajyramas bóligi bolyp keledi.
On jyl ishinde álemniń túkpir-túkpirindegi tyńdarmandary «Umytylmas kúndi» jatqa meńgerip, ár konsertte Dımashpen birge júrekten shyǵaryp oryndaıdy. Ár ánshiniń konserti tyńdarman úshin dál sol «umytylmas kúnge» aınalady.
Án oryndalǵan sátte kórermender myńdaǵan sham ispetti jaryqtardy kóterip, zaldy erekshe atmosferaǵa bóledi. «Mahabbat shamdary» dep atalǵan bul áserli aksıany Dimash Fanclub Deutschland uıymynyń jankúıerleri uıymdastyryp, alty myńǵa jýyq jaryqshamdy kórermenderge taratqan.
Kesh óner, emosıa jáne erekshe energetıkaǵa toly boldy.