Májilistiń jalpy otyrysynda depýtat Erlan Smaılov járdemaqy men zeınetaqy kólemin arttyrý máselesin kóterdi, dep habarlaıdy almaty-akshamy.kz QazAqparatqa silteme jasap.
«Azyq-túlik ónimi, komýnaldyq qyzmet tarıfi baǵasynyń turaqty ósýi men jalpy ómir súrý qunynyń qymbattaýy jaǵdaıynda múgedektigi bar adamdarǵa, bala týýyna baılanysty demalysta otyrǵan analarǵa, kópbalaly otbasylarǵa, zeınetkerlerge jáne halyqtyń basqa da tobynan shyqqan mıllıondaǵan qazaqstandyqtarǵa memlekettik járdemaqy men zeınetaqy kóleminiń artýy asa mańyzdy másele. Prezıdent Qasym-Jomart Kemeluly Toqaevtyń sheshimi boıynsha 2022 jylǵy 1 qańtardan bastap eń tómengi jalaqy qazirgi 42 500 teńgeden 60 myń teńgege nemese 41%-ǵa ósedi. Alaıda Eńbek jáne halyqty áleýmettik qorǵaý mınıstrligi múgedektigi bar adamdardyń, bir jasqa deıingi bala kútimine baılanysty úıinde otyrǵan analardyń, kópbalaly otbasylardyń járdemaqysyn, sonymen qatar eń tómengi zeınetaqyny ulǵaıtý máselesin qarastyryp jatqan joq», - dedi E. Smaılov Premer-Mınıstrdiń orynbasary Eraly Toǵjanovtyń atyna joldaǵan saýalynda.
Onyń aıtýynsha, 2022-2024 jyldarǵa arnalǵan búdjet jobasynda mınıstrlik áleýmettik járdemaqynyń barlyq túrin 2022 jylǵy 1 qańtardan bastap 5%-ǵa arttyrýdy josparlap otyr. Biraq bul kólem ınflásıanyń statısıkalyq ósimi túgili, azyq-túlik pen kıimniń, túrli qyzmetter men tarıf baǵasynyń shyǵynyn jappaıdy.
«Járdemaqy men zeınetaqynyń mólsheri el azamattarynyń naqty qajettiligine saı kelmeıtinin jáne olardyń sapaly ómir súrý deńgeıin qamtamasyz ete almaıtynyn aıǵaqtaıdy. Bul rette Eńbek jáne halyqty áleýmettik qorǵaý mınıstrliginiń qazaqstandyqtardyń múddesine saı kelmeıtin ustanymda bolýy alańdatady. Halyqty qorǵap, Úkimet pen Ulttyq ekonomıka jáne Qarjy mınıstrlikteri aldynda másele qoıýdyń ornyna, mınıstrlik búdjet qarajatynyń tapshylyǵyna silteme jasaıdy. Salalyq mınıstrlik halyqty qorǵaý jolyndaǵy óz mısıasynyń ıdeologıasy men túsinigin áldeqashan joǵaltqan respýblıkalyq uıymǵa aınaldy», - dedi depýtat.
Onyń paıymynsha, memlekettik organnyń mindetine atústi qaraýy eńbek salasyna da áserin tıgizdi.
«Árıne, memlekettik búdjet sheksiz emes, alaıda utymdy josparlaý men paıdalaný arqyly onyń múmkindigin aıtarlyqtaı keńeıtýge bolady. Bul týraly jyl saıyn Esep komıteti júzdegen mıllıard qarajat tıimsiz josparlanatyny jáne paıdalanylatyny týraly qorytyndy beredi. Buǵan aýyl sharýashylyǵy salasyn sýbsıdıalaý kezinde mıllıardtaǵan, tipti trıllıondaǵan qarjynyń jymqyrylýy dálel», - dedi ol.
Joǵaryda aıtylǵandarǵa baılanysty «Qazaqstan Halyq partıasy» depýtattyq fraksıasy QR Úkimetine 2022 jylǵy 1 qańtardan bastap múgedektigi bar adamdardyń, bala kútimi boıynsha úıde otyrǵan áıelderdiń, kópbalaly otbasylardyń járdemaqysy kólemin arttyrýdy usyndy.