Almatyǵa jumys sapary barysynda Densaýlyq saqtaý mınıstri Aqmaral Álnazarova qalanyń medısınalyq nysandaryna baryp, vedomstvonyń, Densaýlyq saqtaý basqarmasynyń aýmaqtyq bólimsheleriniń barlyq basshylarynyń, medısınalyq uıymdardyń bas dárigerleriniń qatysýymen medısına jurtshylyǵymen kezdesý ótkizdi, dep habarlaıdy aqshamnews.kz sala mınıstrligine silteme jasap.
Naýryzbaı aýdanyndaǵy № 36 qalalyq emhanada mınıstr dárigerlik jáne pedıatrıalyq praktıkany, joǵary mamandandyrylǵan medısınalyq kómekti, ońaltý bólimshesin, «Salaýatty jastar» jastar densaýlyq ortalyǵy men modýldik KT-ortalyǵyn qosa alǵanda, emhananyń ártúrli bólimsheleriniń jumysymen tanysty. Munda kishkentaı balalary bar otbasylarǵa úıde patronajdyq qyzmet kórsetýdiń ámbebap progresıvti modeliniń jumysy týraly aıtyldy.
Emhana 65 myńnan astam adamǵa, onyń 29 myńǵa jýyǵy balalarǵa qyzmet kórsetedi.
Óz kezeginde vedomstvo basshysy patronaj qyzmetin uıymdastyrýdaǵy keshendi tásildiń mańyzdylyǵyn atap ótip, qalanyń iri emhanalarynyń biriniń bazasynda Almatynyń barlyq medısınalyq uıymdarynda osy qyzmettiń jumysyn úılestirý úshin biryńǵaı resýrstyq ortalyq qurý qajettigin atap ótti.
Ári qaraı mınıstr Almatynyń eń iri kópbeıindi klınıkasy bolyp tabylatyn № 7 qalalyq klınıkalyq aýrýhanaǵa bardy. Munda jyl saıyn 11000-nan astam operasıa jasalady jáne pasıentterge kómek neırohırýrgıalyq, kardıologıalyq, nefrologıalyq jáne endokrınologıalyq ortalyqtardy qosa alǵanda, 27 klınıkalyq bólimshede kórsetiledi.
Aýrýhananyń dırektory Manas Ramazanov ınovasıalyq emdeý ádisterin engizý, medısınalyq kómektiń sapasyn jaqsartý jáne qyzmetterdiń qoljetimdiligin arttyrý sıaqty mekemeniń jetistikteri týraly aıtyp, tanystyrý týryn ótkizdi.
Aýrýhanada qalaǵa ǵana tán bólimsheler jumys isteıdi: endokrındik aǵzalardyń patologıasy bar pasıentterdi emdeýge arnalǵan endokrınologıalyq ortalyq jáne búırek aýrýlary bar pasıentterdi anyqtaýǵa, emdeýge jáne ońaltýǵa mamandandyrylǵan jalpy qalalyq mártebesi bar nefrologıalyq bólimshn.
Medısınalyq mekemelerge barǵannan keıin Aqmaral Álnazarova Almaty qalasynyń medısına jurtshylyǵymen kezdesý ótkizdi. Kirispe sózinde ol Almaty dárigerleri biliktiliginiń joǵary deńgeıin jáne qalanyń densaýlyq saqtaý júıesine ozyq tehnologıalardy engizýdi atap ótti.
Kezdesý barysynda júkti jáne fertıldik jastaǵy áıelderdi pregravıdarlyq daıarlyqpen jáne zamanaýı kontrasepsıamen qamtýdy, aýyr jaǵdaılarǵa monıtorıń júrgizýdi jáne olarǵa qajetti kómek kórsetý boıynsha sharalar qabyldaý jónindegi jumysty kúsheıtýdi qajet etetin ana men bala densaýlyǵyn saqtaý salasyndaǵy problemalyq máseleler talqylandy.
Budan ári ınsýlt ortalyqtarynyń jumys kórsetkishteri, olardyń jabdyqtarmen jáne kadrlarmen jaraqtandyrylýy kóterildi, qosymsha tehnıkalyq jaraqtandyrýdy talap etetin shuǵyl hırýrgıalyq stasıonarlarda, qalanyń travmotologıalyq pýnktterinde medısınalyq kómekti uıymdastyrýdy erekshe baqylaýǵa alý usynyldy.
2024 jyly densaýlyq saqtaý júıesiniń jumysyn qorytyndylaı kele, ol mindetti medısınalyq saqtandyrý (MMS) júıesindegi reformalarǵa, normatıvtik-quqyqtyq bazany qaıta qaraýǵa jáne «Halyq densaýlyǵy jáne densaýlyq saqtaý júıesi týraly» Kodekske 240-tan astam túzetýler ázirleýge jeke toqtaldy. Bul sharalar MMS júıesin jetildirýge, memlekettik medısınalyq kómektiń biryńǵaı paketin qalyptastyrýǵa jáne onyń ashyqtyǵyn arttyrýǵa baǵyttalǵan.
«Osy jyldyń qyrkúıek aıynda Qazaqstan halqyna Joldaýynda Memleket basshysy búdjettiń múmkindikterimen teńestiriletin medısınalyq kómektiń biryńǵaı paketin (MKBP) qalyptastyrýdy tapsyrdy. Bul paketten tys barlyq nárse medısınalyq saqtandyrý júıesi arqyly qamtylýy kerek. Bir pakettik qarjylandyrýǵa kóshý úshin biz úlken taldamalyq jumys jasap, esepteýler júrgizdik», - dep atap ótti mınıstr.
Densaýlyq saqtaý mınıstrligi 2027 jylǵa qaraı MÁMS paketine medısınalyq-sanıtarıalyq medısınalyq alǵashqy kómek (MSAK) qyzmetterin qosýdy kózdeıtin Biryńǵaı paketke kezeń-kezeńmen kóshý tetigin ázirledi.
Bul rette MÁMS-tegi saqtandyrý mártebesine qaramastan barlyq azamattar úshin memlekettiń tegin kepildikteri (TMKKK) medısınalyq kómektiń mynadaı túrlerine saqtalady:
- Jedel járdem;
- Barlyq ınfeksıalyq aýrýlardy dıagnostıkalaý jáne emdeý;
-Azamattardyń densaýlyǵyna eń kóp zıan keltiretin áleýmettik máni bar aýrýlar (týberkýlez, psıhıkalyq, minez-qulyq buzylystary, AITV, onkologıa, sozylmaly gepatıtter men baýyr sırrozy, orfandyq aýrýlar, jedel mıokard ınfarktisi, ınsýlt) kezinde dıagnostıka, emdeý, dári-dármekpen qamtamasyz etý, stasıonarlyq jáne stasıonardy almastyratyn kómek;
- Ómirge qaýip tóndiretin jaǵdaılarda shuǵyl stasıonarlyq kómek;
- Pallıatıvtik kómek;
- Qan preparattarymen qamtamasyz etý.
Mınıstr medısınalyq kómektiń biryńǵaı paketin engizý birqatar oń ózgeristerge ákeletinin atap ótti. Bul TMKKK jáne MÁMS shekaralarynyń aıqyndylyǵy, qyzmetterdiń qaıtalanýynsyz, áleýmettik máni bar aýrýlarǵa kúdik týyndaǵan kezde zerttep-qaraýlardyń qoljetimdiligi jáne MÁMS mártebesine qaramastan onkoskrınıngterden ótý, naqty shyǵyndarǵa sáıkes tarıfterdiń ósýi.
2027 jyly qarjylandyrýdyń basym saqtandyrý modeline kóshý boıynsha jumys aıaqtalady dep josparlanýda, onda shyǵystardyń araqatynasy TMKKK-ge 30% (1,2 trln teńge) jáne MÁMS-ke 70% (2,85 trln teńge) bolady.
Búgingi tańda memleket 11,9 mln-nan astam qazaqstandyqty quraıtyn balalar, júkti áıelder, zeınetkerler, stýdentter, múgedektigi bar adamdar, jumyssyzdar jáne halyqtyń basqa da sanattary kiretin halyqtyń 15 sanaty úshin saqtandyrý jarnalaryn engizetinin atap ótý mańyzdy. Olar saqtandyrýǵa qaramastan medısınalyq kómekke qol jetkizýdi qamtamasyz etti.
MÁMS júıesine azamattardyń barlyq sanattaryn, sonyń ishinde ál-aýqatynyń daǵdarys deńgeıi bar 1,1 mln turǵyndy qosý nátıjesinde áleýmettik máni bar aýrýlary bar adamdar tobyndaǵy saqtandyrý deńgeıi 93%-ǵa deıin artady.
Jalpy halyqty medısınalyq saqtandyrýmen qamtýdy ulǵaıtý boıynsha qabyldanǵan sharalar, memlekettiń halyqtyń jeńildikti sanatyn saqtandyrý jónindegi mindettemeleri medısınalyq kómektiń, onyń ishinde MSAK kórsetýdiń qoljetimsizdigi qaýipterin barynsha azaıtady.
Sondaı-aq, vedomstvo basshysy MSAK-ty jańǵyrtýǵa, pasıentter úshin medısınalyq kómektiń qoljetimdiligi men sapasyna qatysty oń ózgeristerge tolyǵyraq toqtaldy.
Jumys keńesinen keıin Densaýlyq saqtaý mınıstri Almaty turǵyndarymen kezdesý ótkizip, azamattardy jeke máseleleri boıynsha qabyldady.
Mınıstrdiń jumys sapary Almatynyń densaýlyq jaǵdaıyn keshendi baǵalaýǵa, jumystyń negizgi baǵyttaryn anyqtaýǵa jáne bolashaqqa josparlardy belgileýge múmkindik berdi.