Qazaqstanda «Debút» shyǵarmashylyq-óndiristik birlestigi qaıta qurylmaq. Mundaı bastamany Ulttyq kınony qoldaý memlekettik ortalyǵy kóterip otyr, dep habarlaıdy Almaty-akshamy.kz Inform.kz-ke silteme jasap.
«Qazirgi ýaqytta Kıno ortalyǵy tanymal kınematografıstermen birlesip, uzaq jyldar boıy «Qazaqfılm» kınostýdıasynyń qurylymynda bolǵan «Debút» shyǵarmashylyq-óndiristik birlestigin qaıta qurý bastamasyn kóterdi. Bul másele búginde barynsha ózekti dep sanaımyz», - dep atap ótken edi uıymnyń baspasóz qyzmeti agenttiktiń resmı saýalyna bergen jaýabynda.
Al «Ulttyq kınony qoldaý memlekettik ortalyǵy» KEAQ basqarma tóraǵasy Esetjan Qosybaevtyń aıtýynsha, bul úshin atalǵan birlestiktiń qurylymyna, qarjylandyrylýyna jáne qyzmetine qatysty máselelerdi sheshý qajet.
«Biz bul ıdeıanyń negizgi bastamashysy retinde qazirdiń ózinde Mádenıet jáne sport mınıstri Dáýren Abaevpen áńgimelestik jáne de mınıstrlikten bolashaq birlestiktiń zańdy mártebesin kelisýdi suraıtyn bolamyz», - dedi Esetjan Qosybaev.
Esterińizge sala keteıik, «Debút» shyǵarmashylyq-óndiristik birlestigi otyz jylǵa jýyq ýaqyt boıy «Qazaqfılm» kınostýdıasynyń quramynda jumys istedi. Birlestiktiń basty mindeti kıno salasyna súbeli úles qosa alatyn jas talanttardy anyqtaý bolatyn.