Almatyda 26 mamyr kúni álemge áıgili ánshi, QR Halyq ártisi Dımash Qudaıbergenniń D&Dears atty fan-kezdesýi ótti. Myńdaǵan jankúıer súıikti ártisin kórý úshin shekara men qashyqtyqty eńserip kelgen. Álemniń túkpir-túkpirinen kelgen tyńdarmandaryn Almaty Arena-ǵa jınaǵan ánshiniń keshi kútpegen jaıttarǵa toly boldy. Bul jolǵy kezdesý nesimen erekshelendi? Aqshamnews.kz tilshisi materıalda tarqatady.
40 memlekettiń tyńdarmandaryn toǵystyrǵan júrek
Dımashty kórýge 40 memleketten jankúıerleri jınaldy. Olar AQSH, Qytaı syndy alpaýyt elderden bastap, Belgıa, Shveısarıa, Farnsıa jáne taǵy da basqa jerlerden kelgen. Olar súıikti ánshisine degen sheksiz qurmetin bildirip, arnaıy estelik syılyqtar men gúl shoqtaryn ala kelgen.
sýrette: Qytaılyq Dears atynan Dımashqa gúl shoǵy
Dımashtyń shynaıy jankúıerlerin, ıaǵnı Dears-ty alystan tanýǵa bolady. Nege deseńiz, olar erekshe obrazdarymen birden kózge túsedi. Tyńdarmandar Dımashtyń beınesi bar kıimder kıip, esimi jazylǵan plakattar ustap súıikti ártisimen kezdesýdi asyǵa kútti.
sýrette: Nú-Iorktan kelgen jankúıerler
Al bul Dımashtyń Fransıadan kelgen jankúıeri - Ýendı. Ol súıikti ánshisiniń qurmetine denesine 5 tatý saldyrǵan.
"Men Dımashty óte qatty syılaımyn, qurmetteımin. Onyń qarapaıymdylyǵy, minezi, bolmysy kez kelgen adamdy ǵashyq etpeı qoımaıdy. Oǵan arnap osyndaı tatý saldyrýym, oǵan degen qurmetimniń belgisi. Onyń "Sky" degen áni meni erekshe shabyttandyrdy. Sol úshin osyndaı ózime máńgige belgi qaldyrdym" dedi ol.
Dımashpen kezdesýge Qazaqstannyń túrli qalalarynan da ánshiniń qurmettileri (Dears - esk.) jınalǵan. Olar da Dımashqa degen mahabbattaryn sózsiz-aq, dáleldep tur.
Taldyqorǵannan kelgen jankúıer atamyz 95 jastaǵy anasynyń Dımashqa jazǵan hatyn ala kelipti. Onda anasy Dımashqa izgi nıetin jetkizip, úılený kerektigi jaıly jazǵan deıdi ata:
"Meniń anam da Dımashtyń jankúıeri. Maǵan "Dımashqa ber" dep arnaıy hat berip jiberdi. "Óziń sıaqty ádemi, talantty, anań Svetlana sıaqty ınabatty, tárbıeli qyzdy taýyp, úılen" dep jazyp jibergen eken. Amanattap tabystaǵan soń, Dımashqa berý paryzym" deıdi ata.
Dımashtyń tyń jańalyqtary
Fan-kezdesý Dımashty 24 mamyr kúni ótken týǵan kúnimen quttyqtaýdan bastaldy. Suhbattasý barysynda Dımash vıktorınalyq suraqtarǵa jaýap berip, bilimin de synǵa saldy. Sondaı-aq, ol kópshilikpen kópten kútken jańalyǵyn bólisti.
"Buıyrsa mende bir qýanyshty jańalyq bar. Aldaǵy jyly Qytaıdyń tanymal Hunan TV telearnasymen birlesip iri halyqaralyq prodúserlik jobamdy jaryqqa shyǵaramyn. Bul – álemniń túkpir-túkpirinen talantty oryndaýshylar qatysatyn jańa án baıqaýy bolady. Atalǵan jobada men qazylar alqasynyń quramynda bolamyn" dedi Dımash Qudaıbergen.
Áńgime barysynda Dımash QR Halyq ártisi Bıbigúl Tólegenovaǵa qońyraý soǵyp, batasyn aldy. Bıbigúl apamyz da Dımashty týǵan kúnimen quttyqtap, tilek bildirdi.
Sondaı-aq, Dımash Qudaıbergen oryndaıtyn tyń týyndy "Taý ishinde" ánine jarıalaǵan chellendjdiń jeńimpazdary belgili boldy. Olar - №58 mektep dırektory Aqmonshaq Nurtaza jáne Chılılik jankúıer Andrea. Jeńimpazdardyń vıdeosy jelide eń kóp qaralym jınaǵan. Olar endi Dımashtyń Eýropada ótetin konsertine baratyn bolady.
Keshte taǵy bir erekshe oqıǵa boldy. "Balqadısha" ánin oryndap, jelide tanylǵan Isa Bekbolat ta kezdesýde tóbe kórsetti. Ol Dımashtyń shaqyrtýymen Almatyǵa arnaıy kelip, 10 myń adamnyń aldynda án shyrqady.
Qazaqstandyq ártister Dımashtyń ánderin oryndady
Jankúıerlermen kezdesý konserttik baǵdarlamaǵa ulasty. Dımashtyń áıgili ánderin qazaqstandyq juldyzdar Dastan Orazbekov, Sadraddın, Sáken Maıǵazıev, Ernar Amandyq, Aqbota-Nur, KeshÚ, Zarına Altynbekova ózgeshe ınterpretasıada oryndap shyqty. Artynsha Dımash ta repertýaryndaǵy jańa ánderin shyrqap, halyqtyń qoshemetine bólendi.
sýretter: Aqshamnews.kz/Nurbol Yntymaquly