Medına Mırzoeva, «Barbang» Qazaqstan kúrdter qaýymdastyǵy janyndaǵy Analar keńesiniń tóraǵasy:
– Men sońǵy toǵyz jyldan beri Jetisý aýdanyndaǵy №496 saılaý ýchaskesinde komısıa múshesi bolyp jumys isteımin. Elimizdegi talaı mańyzdy oqıǵalardyń kýási boldym. Ózim Medeý aýdanynyń turǵyny bolsam da, jumys ornyma baılanysty Jetisý aýdanyndaǵy saılaý ýchaskesine aýystym. Osy jerde óz daýysymdy berdim. Bizdiń elde saılaý ádiletti ótedi dep naqty aıta alamyn. Qazaqstan Respýblıkasynyń patrıot azamaty, qoǵam belsendisi retinde barsha otandasymdy saılaýǵa atsalysýǵa shaqyramyn.
Qazaqstan táýelsizdigin alǵaly beri 8-inshi ret Parlament saılaýy ótkizilip otyr. 2023 jyldyń 19 qańtarynda Prezıdent Qasym-Jomart Toqaev Parlamenttiń tómengi palatasy jáne barlyq deńgeıdegi máslıhatty taratty. Kezekten tys saılaý daýys berý júıesiniń reformasy aıasynda búginge, ıaǵnı 19 naýryzǵa belgilendi. 2022 jyldyń 19 maýsymynda ótken referendýmda qabyldanǵan birqatar konstıtýsıalyq túzetýlerge sáıkes Qazaqstan araǵa 19 jyl salyp, aralas saılaý júıesine oraldy.
Kóptegen bedeldi halyqaralyq uıymdardyń belsendi múshesi bola otyryp, Qazaqstan erkin jáne ádiletti saılaý ótkizý boıynsha ózine alǵan barlyq mindettemelerdi berik ustanady.
Memleket basshysy Qasym-Jomart Toqaev bılik ınstıtýttaryn jańartýdyń sońǵy kezeńi Májilis pen máslıhat saılaýy ekenin aıtqan bolatyn. Mundaǵy basty mindet – eldiń damý jolynda jańa bastamalardy usyný jáne olardy tıimdi iske asyrý. Prezıdent aıtqandaı, saılaýdan keıin elimizdi jan-jaqty jańǵyrtý baǵytyndaǵy jumystar qarqyn ala túsedi.
Bolashaqta Qazaqstan shyn máninde úlken saıası lıberalızasıaǵa umtylatynyna, anaǵurlym kúshti Parlament quratynyna senemin. Prezıdent Toqaev usynǵan reformalardyń bolashaǵy zor. Bul shyn máninde kóppartıalyq júıeni qurý úshin berik negiz bola alady, qadaǵalaýdyń tıimdi tetikterin engizýge jáne Qazaqstan Úkimetiniń ártúrli deńgeılerinde eseptilikti arttyrýǵa kómektese alady dep oılaımyn.