Májilistegi Úkimet saǵatynda eldegi týrızm salasyn damytý jaıy qozǵaldy
Túrkistan qalasynda beıindi Halyqaralyq týrızm jáne meımandostyq ýnıversıteti bazasynda sheteldik jetekshi joǵary oqý oryndarynyń fılıalyn ashý múmkindikteri qarastyrylýda, dep habarlaıdy Almaty-akshamy.kz QazAqpartqa silteme jasap.
«Biz 2025 jylǵa qaraı týrızm salasynda 60 myńǵa jýyq jańa jumys ornyn ashýdy kózdep otyrmyz. Investısıalyq jáne ınfraqurylymdyq jobalardy iske asyrý da, sondaı-aq ekonomıkanyń túrli salalarynda halyqtyń jumyspen qamtylýyna jol ashatyn týrbıznes qyzmetin jandandyrý da osyǵan yqpal etedi. Bul bilikti kadrlarǵa degen suranysty arttyrady», - dedi D. Abaev.
Osy oraıda ol 2020 jyldan bastap Túrkistan qalasynda beıindi Halyqaralyq týrızm jáne meımandostyq ýnıversıteti jumys isteı bastaǵanyn, onda 7 baǵyt boıynsha 1 300-den astam stýdent oqıtynyn eske saldy.
«Ýnıversıtet 2021 jylǵy jeltoqsanda Birikken Ulttar Uıymynyń Dúnıejúzilik týrısik uıymy (IýNVTO) Bas Assambleıasynyń akkredıttelgen múshesi boldy. Túrkıa, Fransıa, Portýgalıa, Avstrıa, Vengrıa jáne basqa elderdiń jetekshi joǵary oqý oryndarymen yntymaqtastyq ornatyldy. Búginde ýnıversıtet dýaldy bilim berýdi tabysty júzege asyrý arqyly halyqaralyq ozyq tájirıbe almasatyn salalyq habqa aınalyp keledi. Qazir ýnıversıtet janynan IýNVTO akademıasyn ashý, sondaı-aq, IýNESKO ǵylymı-zertteý ortalyǵyn qurý boıynsha kelissózder júrgizilip jatyr. Sondaı-aq ýnıversıtet bazasynda meımandostyq salasy boıynsha sheteldik jetekshi joǵary oqý oryndarynyń fılıalyn ashý múmkindikteri qarastyrylýda», - dedi mınıstr.