№7 qalalyq klınıkalyq aýrýhana dárigerleri jol apatyna ushyraǵan 40 jastaǵy er adamdy ólimnen arashalap qaldy. Jaraqat deńgeıiniń aýyrlyǵy sonshalyq, onyń oń aıaǵyn kesip tastaý qaýpi týyndaǵan bolatyn, dep habarlaıdy aýrýhananyń baspasóz qyzmeti.
Aýrýhananyń polıjaraqat bólimshesi meńgerýshisi Ramazan Áskerovtiń aıtýynsha, pasıent munda jedel járdemmen jetkizilgen. Moped júrgizýshisi jolda apatqa ushyrap, kóptegen jaraqat alǵan. Kelgen kezde ol asa aýyr halde bolǵandyqtan synyqtyń aýqymyn tolyq baǵalaý múmkin bolmady.
«Men muny erekshe klınıkalyq jaǵdaı der edim. Apat kezinde naýqas kóptegen jaraqattar alǵan, denesiniń msaý jeri joq. Oń aıaǵynyń pishini tolyqtaı buzylǵan, jilinshik aýmaǵynyń terisi sydyrylyp, ezilip qalǵan, úlken jaryq jara paıda bolypty. Súıekteri de synǵan, sol sebepti aıaǵynyń basy qozǵalmaı qalǵan. Ádette mundaı jaǵdaıda aıaqty kesip tastaımyz», – deıdi Ramazan Áskerov.
Pasıentti tolyq tekserip shyqqannan keıin dárigerler máskeýlik hırýrg Denıs Remashevskımen birlesip aıaqty qalpyna keltirý operasıasyna kirisip ketti. Kúrdeli ota mindetti áleýmettik medısınalyq saqtandyrý sheńberinde jasaldy.
«Terisi, bulshyq etteri men súıek tinderiniń kóp mólsherde zaqymdanǵanyn eskere otyryp máskeýlik áriptesimizben birge plasıkalyq qalpyna keltirý operasıasyn jasaý týraly sheshim qabyldadyq. Bylaısha aıtqanda, jansyzdanǵan tinder alyp tastaldy. Jilinshiktiń art jaǵyndaǵy bulshyq etterdi aldyńǵy jaǵyna aýystyryp, sanynan teri alyp jalǵadyq. Operasıanyń biregeıligi de osynda», – deıdi maman.
Aıtýynsha, qazir aýtodermoplastıka ádisimen jalǵanǵan teri ornyqty, pasıenttiń jaǵdaıy jaqsy. Qazir ol aýrýhanadan shyǵýǵa daıyndalyp jatyr.