Ótemaqyny saqtandyrý kompanıasy tóleıdi.
Tólemnen bas tartqan jáne qanaǵattanbaǵan jaǵdaıda pasıent sotqa júginýge quqyly, dep habarlaıdy Almaty-akshamy.kz
Parlament májilisi medısına qyzmetkerleriniń kásiptik jaýapkershiligin saqtandyrýdy jáne kásibı mindetterin tıisinshe oryndamaǵany úshin jazalardy izgilendirýdi kózdeıtin zań jobasyn birinshi oqylymda maquldady.
Densaýlyq saqtaý mınıstri Ajar Ǵınıattyń aıtýynsha, zań jobasynda medısına qyzmetkerleriniń kásiptik jaýapkershiligin saqtandyrý júıesin kezeń-kezeńimen engizý tetigi men joldary qaralǵan. Mınıstrlik zań jobasyn ázirleý barysynda álem elderiniń tájirıbesin zerdelegen.
Halyqaralyq tájirıbede medısına qyzmetkerlerin qorǵaý úshin qorlar men qaýymdastyqtar qurý arqyly, sondaı-aq jeke naryqtar arqyly kásiptik jaýapkershilikti mindetti saqtandyrý júıesi qoldanylady. Kásiptik jaýapkershilikti saqtandyrý mindeti medısına qyzmetkerlerine nemese densaýlyq saqtaý uıymdaryna júktelgen.
«Pasıent qyzmettiń nemese komısıanyń sheshimimen kelispegen jaǵdaıda shaǵym saraptamalyq qorytyndy berý úshin densaýlyq saqtaý mınıstirligi medısınalyq jáne farmasevtıkalyq baqylaý komıtetinde qaralady. Dáleldengen jaǵdaıda shaǵym boıynsha materıaldar, onyń ishinde sot-medısınalyq saraptamanyń qorytyndysy medısınalyq uıym saqtandyrylǵan saqtandyrý kompanıasyna beriledi», - dedi Ǵınıat.
Pasıentke keltirilgen zıan úshin ótemaqy tóleýdi saqtandyrý kompanıasy júrgizedi. Tólemnen bas tartqan jáne qanaǵattanbaǵan jaǵdaıda pasıent sotqa júginýge quqyly. Saqtandyrý jarnasynyń mólsheri qaýip dárejesine qaraı bekitilgen aktýarlyq esepteýlerdiń negizinde medısına qyzmetkeriniń jaýapkershilik dárejesi eskerile otyryp aıqyndalady. Densaýlyq saqtaý mınıstrligi 2023 jyldan bastap saqtandyrýdy jumys berýshiniń esebinen júzege asyrýdy usynyp otyr. Al 2025 jyldan bastap saqtandyrý syılyqaqysy medısınalyq uıym men medısına qyzmetkerleri arasynda bólinedi, bul yntymaqty kásiptik jaýapkershilikke ákeledi.