Vaksınanyń eki dozasy 91% tıimdi
Bul týraly №22 Almaty emhanasy bas dárigeriniń orynbasary Aqerke Jomart aıtty, dep habarlaıdy Almaty-akshamy.kz Baq.kz-ke silteme jasap.
Onyń aıtýynsha, balalaryn vaksınasıalaýdan bas tartqan ata-analar olardy qorǵaýdan aıyrady.
«Basqa bilim alýshylarǵa qaýip tóndiredi, bul ınfeksıanyń odan ári taralýyna yqpal etedi. Al amerıkalyq vaksınaǵa toqtalar bolsam, Pfizer jarıalaǵan zertteýler vaksınanyń eki dozasy 91% tıimdi jáne qaýipsiz ekenin kórsetedi. Eger olar koronavırýspen aýyrsa da, balalarǵa antıdenelerdi tekserýdiń qajeti joq. Aýrýdyń nátıjesinde alynǵan ımýnıtet vaksınasıadan keıin alynǵan ımýnıtetke qaraǵanda qysqa bolady dep sanalady», - dep atap ótti bas dárigerdiń orynbasary.
Dárigerdiń aıtýynsha, búgingi tańda balalar, júkti jáne bala emizetin áıelder arasynda vaksınalardyń nashar tózimdiligi týraly eshqandaı pikir joq. Onyń málimetinshe, olardyń emhanasynda 12 qarashadan bastap 139 jasóspirim, laktasıa kezinde 22 áıel jáne 25 júkti áıel ekpe aldy.
Aqerke Jomart júkti áıelderdi dárigerlerdiń usynystaryna qulaq asyp, júktiliktiń 16-37 aptasy aralyǵynda egý pýnktine kelýge shaqyrdy. Vaksınany alý áıeldi de, onyń bolashaq balasyn da qorǵaý úshin qajet dep otyr.