Almaty ákimi "Taza Qazaqstan" bastamasyn júzege asyrýǵa jastardy kóptep tartýdy tapsyrdy, - dep habarlaıdy aqshamnews.kz tilshisi.
Almatyda qala ákimi Darhan Satybaldynyń tóraǵalyǵymen "Taza Qazaqstan" jalpyrespýblıkalyq ekologıalyq naýqanyn júzege asyrý máselesi boıynsha keńeıtilgen keńes ótti. Jıynda atqarylǵan jumystardyń nátıjeleri, vedomstvoaralyq ózara is-qımyldyń tıimdiligi jáne aldaǵy ýaqyttaǵy basym baǵyttar, sonyń ishinde turǵyndardy ekologıalyq aksıalarǵa tartý máseleleri talqylandy.
Jastardyń ekologıalyq bastamalarǵa kóptep qatysýyna erekshe nazar aýdaryldy. Qala basshysy atap ótkendeı, dál osy býyn qaladaǵy qorshaǵan ortaǵa jaýapkershilikpen qaraý men turaqty tazalyq mádenıetin qalyptastyrýda sheshýshi ról atqarady.
Aıta keteıik, Almatyda jastardy tartý maqsatynda eńbek jasaqtary, eriktiler qozǵalysy, "Jasyl el", "Ekoreındjerler" jobalary, stýdenttik qaýymdastyqtar men komúnıtı-ortalyqtar qala ákimdiginiń jobalyq keńsesiniń qoldaýymen belsendi jumys istep jatyr.
"Jasyl el" aıasynda 2 myńnan astam jas senbilikter men tanymdyq is-sharalarǵa qatysty. 144 000 jasyl jasyl jelek tekserilip, 35 ruqsatsyz qoqys alańy anyqtaldy. Komúnıtı-ortalyqtar shaǵyn ekohabtar retinde jumys istep, turaqty tutyný mádenıeti men resýrstardy uqypty paıdalaný ádetin qalyptastyryp otyr. Bul bastamalarǵa 15 myńnan astam almatylyq jas qamtylǵan.
"Taza Qazaqstan" aksıasy bastalǵaly Almatyda 170-ten astam is-shara uıymdastyrylyp, 35 myńnan astam adamdy qamtydy. Qala turǵyndary senbilikterge, ekologıalyq reıdterge jáne ózge de jobalarǵa belsendi qatysyp keledi.
Sonymen qatar keri baılanys úshin sıfrlyq quraldar iske asyrylýda. Bıyl shildede TazaQazBot platformasy arqyly qala turǵyndarynan 305 ótinish tústi. Olardyń basym bóligi sheshimin tapty. Qazir sanıtarlyq tazalaý, qoqys shyǵarý, aǵashtardy kesý men butaý, sýarý júıelerin qalpyna keltirý jumystary júrgizilip jatyr. Jasyl qordy baqylaý jáne problemalyq aýmaqtardy retke keltirý jumystary qatar atqarylyp otyr.
Darhan Satybaldy "Taza Qazaqstan" bir rettik aksıa emes, jańa qala mádenıetin qalyptastyrýǵa baǵyttalǵan júıeli jumys ekenin atap ótti. Jıyn qorytyndysy boıynsha Almaty ákimi jastardyń atsalysýyn kúsheıtýdi, kreatıvti formattar men sıfrlyq bastamalardy qoldaýdy, aýmaqtardyń sanıtarlyq jaǵdaıyna turaqty monıtorıń júrgizýdi jáne halyq arasynda TazaQazBot platformasynyń qoldanys aıasyn keńeıtýdi tapsyrdy.